28/05/2023 列斯聯 vs 熱刺 - 賽前分析

足球資訊 | 英格蘭超級足球聯賽(2022/23) | 發布日期: 28/05/2023

排名: 列斯聯(19) vs 熱刺(8)

英超煞科戰，列斯聯同熱刺都要搶分。愛華頓(33分)，李斯特城同列斯聯(31分)都有機會降班，只有一隊最後可以逃出生天。其中愛華頓主場對般尼茅夫只要贏就能夠成功護級，另外兩隊贏波仲要寄望護級對手失分。列斯聯形勢最險峻，得失球最差，對手仲係最強。護級專家領隊大Sam Allardyce帶領嘅護級球隊中，只得西布朗最後降班，佢今次嘅任務頗為艱巨，只得4場俾佢拯救球隊，眼見列斯聯由11月到而家，主場只係贏過2次，星期二就請咗名宿Eddie Gray，Gary McAllister同球員打氣，亦將訓練場搬到艾蘭路球場，希望幫球員克服心理障礙。

大Sam話領隊生涯中最驚險嘅一次，喺保頓嘅第二季，鬥到最後一場先成功護級。佢當時只係睇現場球迷嘅反應，冇去問其他賽果，今次亦會專心比賽。上場對韋斯咸，憑藉隊中神射手Rodrigo先射入1:0，但把握能力不足，加上後防失誤，最後輸1:3。列斯聯今季聯賽37場失咗74球，今季主場對住聯賽榜前半版嘅球隊，只能和4場輸5場，而近8場聯賽亦只和2輸6。今場要對近期持續有入球嘅Kane，形勢並唔樂觀，加上Bamford同Rodrigo上場受傷，後者雖然已經復操，狀態成疑。但大Sam話呢場生死戰，會背城借一，以球員狀態作賭注，只要球員準備好，都會派佢哋上陣。

熱刺自Conte離隊後，9場聯賽只係贏咗2場，喺聯賽榜滑落至第八，落後維拉一分，賓福特少一分緊隨其後，三隊都有機會來季踢歐協聯。熱刺仲希望踢歐洲賽嘅話，就要自己爭氣兼且維拉失分。今季雖然Kane仍然表現穩定(11場入10球)，但佢哋嘅後防就一蹶不振，上場對賓福特Kane先入波，最後仍失3球輸波，現時失球數字已經平咗球會單季嘅紀錄(62)。中堅Romero受傷，Dier剛完成鼠蹊手術，將會缺陣呢場賽事，脆弱嘅後防就雪上加霜。呢場有機會係Kane喺熱刺嘅告別戰，球季未完就有傳聞佢想離隊，而其中一隊對佢有興趣嘅就係曼聯。Kane之前五季聯賽最後一場都有波入，面對要搶分又後防不穩嘅列斯聯，要再尾場入波並唔困難。

分類:

足球資訊

28/05/2023 列斯聯 vs 熱刺 - 賽前分析

分類:

標籤:

關於我們:

快速連結:

聯絡我們: