19/02/2023 曼聯 vs 李斯特城 - 賽前分析

足球資訊 | 英格蘭超級足球聯賽(2022/23) | 發布日期: 19/02/2023

排名: 曼聯 (3) vs 李斯特城 (14)

英超狀態大勇嘅曼聯會主場出擊，迎戰近況唔錯嘅李斯特城。曼聯喺週中作客對巴塞隆拿，仍然能夠表現穩定，而且喺聯賽氣勢如虹，直逼頭兩隊。李斯特城就唔止擺脫咗降班威脅，近3場仲入咗10球。佢哋由舊年一月開始，未試過聯賽連贏3場，希望趁住球員狀態冒升，可以喺奥脱福攞到甜頭。

曼聯隊中最fit嘅，唔使講一定係聯賽盃賽歐洲賽都有入波嘅Rashford。喺對巴塞嗰場歐霸淘汰賽附加賽首回合，曼聯喺先失1球嘅情況下，由Rashford窄位射入佢今季嘅第22個入球，及後佢嘅全中波亦令Koundé擺烏龍，最後兩隊打和2:2。曼聯喺冬季轉會窗借用身高1.97m，綽號恐龍(The dinosaur)嘅Weghorst，大家都認為佢會係曼聯鋒線上欠缺嘅九號仔，但剛剛對巴塞，九號墜後變成十號。作為前鋒，佢踢咗9場只入咗1球，但佢有控球在腳，攔截，前場逼搶，為左右翼製造機會嘅能力，跟熱刺嘅Kane踢法相似。Ten Hag刻意改造Weghorst，希望將Eriksen缺陣嘅影響減到最低。

佢哋嘅對手李斯特城，一個月前仍然喺降班邊緣徘徊，世界盃後4場全部輸晒，只係入咗1球。最近慢慢開始上力，先和白禮頓，然後火力狂開，對維拉同熱刺各轟入4球，鋒線上Maddison, Barnes, Iheanacho合作無間，三位近2場聯賽都有入球同助攻。其中Iheanacho更係2入球3助攻，除咗盡顯射手本色，亦為隊友製造機會。李城雖然展示咗超強嘅攻力，但失球數字就處於聯賽榜尾三，踢法以攻代守。佢哋今季作客，只得1場係冇入球，作客入球數字聯賽榜排第二，就算作客都唔會踢得保守。

呢場曼聯嘅Antony, Martial預計仍然會缺陣，而喺對巴塞時表現出色嘅Casemiro就繼續停賽。李城方面，進攻主力Maddison雖然仍然受膝頭傷患困擾，但領隊Rodgers就確定佢無問題。雖然三箭頭都可以上陣，但曼聯聯賽主場今季已經11場不敗，其中只係和過1場，要作客攞分並唔容易。