16/10/2022 利物浦 vs 曼城 - 賽前分析

足球資訊 | 英格蘭超級足球聯賽(2022/23) | 發布日期: 16/10/2022

排名: 英超 (11) vs英超 (2)

直播資訊: NowE/NOW621

利物浦聯賽踢八場只係贏咗兩場，最後一次贏波仲要係八月份，近年都未試過咁差，而家弱勢下仲要打曼城。好彩星期三晚歐聯大勝格拉斯哥流浪7:1，Klopp期望可以藉此振奮軍心。

兩隊喺2022 年對賽三次（足總杯、聯賽、社區盾），利物浦都未輸過，季前以大勇姿態擊敗曼城，贏得社區盾。Klopp 話對曼城，需要絕對專注，運用所有嘅足球知識，係佢嘅最大挑戰。射手Núñez 近幾場開始上力，無論正選或後備，聯賽同歐聯都有波入。Klopp認為如果Núñez係踢曼城，入球會比而家喺利物浦多，所以隊友要為佢製造更多機會。由於今季左右閘未有正常發揮，Robertson 傷完又到Alexander-Arnold，中場創造力欠奉，對鋒線嘅供應，當然唔及曼城。至於Salah，佢近幾場就比較沉，對格拉斯哥流浪時，少有要踢後備，竟然造就咗佢完成歐聯史上最快嘅hat-trick。

季前社區盾，曼城確實係未夾倒新人Haaland，球員仍然係自己扭入禁區。開季後，中前場開始以Haaland 為重心。Foden、De Bruyne源源不絕嘅供應，加上Haaland 嘅射手觸覺，令佢每場聯賽唔係有入球就係有助攻。呢個鐵三角，今季喺所有賽事已經製造咗27入球17助攻。週中歐聯，Haaland 因為需要休息而未有上陣，但星期日就隨時候命。佢暫時9場聯賽入左15球（包括3次帽子戲法），仲差18球就可以打破Salah 喺38場32球嘅紀錄，而球季到而家都未踢夠四份一！喺歐聯對哥本哈根，Haaland入到第二球後，哥本哈根門將就講咗句：佢唔係人類 (This guy is not human)。睇嚟而家，都冇乜邊個會唔同意Haaland 係入球機器。

雖然喺聯賽榜差13分，Guardiola 對今場比賽仍然好謹慎，佢話幾個月前利物浦仲挑戰緊四冠，而家球員同領隊都仲係同一班人，所以咩事情都可以發生，作客晏飛路，要以最高水平迎戰。