19/03/2023 車路士 vs 愛華頓 - 賽前分析

足球資訊 | 英格蘭超級足球聯賽(2022/23) | 發布日期: 18/03/2023

排名: 車路士(10) vs 愛華頓(15)

十五場賽事只係贏得兩場之後，車路士從谷底反彈，3連勝兼且近2場賽事入咗5球，5球已經係佢哋之前12場嘅入球總數。上場聯賽贏李斯特城，亦終止左佢哋8場作客不勝嘅紀錄。領隊Potter亦暫時保住份工，鬆一口氣。今場面對今季作客，只係去年十月贏過修咸頓一場咁多嘅愛華頓，車路士作為今季聯賽主場失球最少嘅一隊，要攞3分並唔困難。Potter話先盡力去贏愛華頓，再集中火力對皇馬，希望可以贏歐聯。

愛華頓喺Dyche到埗前，20場只係得4場不失球，新帥帶領7場已經有3場。要護級就先要搞好防守，唔失波已經有分落袋。近7場賽事，愛華頓就攞咗10分，已經佔整個球季得分嘅40%。暫時脫離咗降班區，Dyche臨危受命真係做倒嘢。可惜今季佢哋作客嘅成績差勁，9場作客賽事，得2場係有入球，今季連續11場作客冇贏過，作客入球數字亦同狼隊、修咸頓並列聯賽榜尾。射手Calvert-Lewin仍然受傷患困擾，今季加盟嘅Maupay聯賽亦只係入咗1球，反而受Dyche信賴嘅般尼舊部Tarkowski同McNeil就已經各有一個入球。

車路士自從Thiago Silva受傷之後，改踢三中堅，防守上仍然撐得住。鋒線上球隊嘅選擇比較多，João Félix表現搶鏡，對李斯特城時，入球被VAR推翻，又有一球中楣，但下半場就被換出，領隊Potter解釋主要係戰術需要，所以換入負責逼搶嘅Gallagher。睇返João Félix喺車路士嘅表現，佢防守相對較弱，上場亦係佢喺自己半場失控球權，造就對手Daka扳平。兩閘無傷無病，對車路士嘅整體表現尤其重要，Chilwell對李斯特城，左腳一個窩利射破母會大門，佢復出之後，狀態慢慢回升，近2場有助攻又有入波。

車路士除咗Broja，Thiago Silva養傷中，Mount，Sterling仍然倦勤。James已經復操，Kanté就受傷五個月後，呢場有機會復出。