07/05/2023 紐卡素 vs 阿仙奴 - 賽前分析

足球資訊 | 英格蘭超級足球聯賽(2022/23) | 發布日期: 07/05/2023

排名: 紐卡素(3) vs 阿仙奴(2)

上季季尾，阿仙奴作客紐卡素，全取3分已經差唔多穩奪歐聯一席，可惜0:2落敗，歐聯入場券拱手相讓咗比同市對手熱刺。事隔一年喺同一地點，爭前四嘅變成紐卡素，阿仙奴就為咗一線嘅爭標希望而努力掙扎。紐卡素現時排第三，場數同第四嘅曼聯一樣，只係領先2分，而再後面亦有步步進逼，六連勝嘅利物浦。首循環雙方勢均力敵，以0:0握手言和。阿仙奴近三場作客賽事都未能打開勝局(2和1負)。而紐卡素今季主場只輸過一次，對賽倫敦球會亦12場不敗。

阿仙奴中堅Saliba嘅受傷，直接影響咗佢哋嘅爭標形勢。佢缺陣期間，阿仙奴連和三場，再輸比曼城，摧毁咗所有嘅領先優勢。上場另一中堅Gabriel腳踭受傷，嚟緊亦未必能趕及復出，疲弱嘅防線真係雪上加霜。對車路士時，Arteta就用Jorginho嘅豐富經驗控制中場，作為後防屏障，終於贏返場士氣波。不過近期激戰連場，阿仙奴中前場嘅活力亦開始減退，Saka狀態下滑，而首席射手Martinelli亦需要休息。較少上陣嘅Trossard，喺中前場嘅竄擾，就令車路士後防疲於奔命。Trossard雖然下半季先加盟，但已經係球隊嘅作客助攻王，半季已經有5個助攻。無論係佢或者Martinelli，面對經常出擊嘅Trippier，都會造成一定威脅。

紐卡素近況唔錯，大勝熱刺6:1，再贏護級嘅愛華頓同修咸頓，加上近期兩個前鋒都狀態火熱，將會強勢迎戰阿仙奴。四月份七場聯賽Wilson入咗8球亦有1個助攻，其中三場更入2球。隊友Isak就有4個入球同1次助攻。雖然近三場都有失波，但紐卡素就共轟入13球。兩個前鋒都腳風大順，Howe就錫住嚟用，通常只派其中一個做正選。上星期日對修咸頓，喺半場落後嘅情況下，Howe終於晒冷，下半場換入Wilson，Isak移到左翼，落底線傳中比門前嘅Wilson射入先扳平，最後由Wilson埋單贏3:1。強矛對弱盾，傷兵滿營嘅阿仙奴防線，今次將會受到極大考驗。