16/05/2023 李斯特城 vs 利物浦 - 賽前分析

足球資訊 | 英格蘭超級足球聯賽(2022/23) | 發布日期: 15/05/2023

排名: 李斯特城(19) vs 利物浦(5)

李斯特城同利物浦將會上演一場搶三分戰，李斯特城而家處於聯賽尾二，比愛華頓同列斯聯踢少一場。利物浦就喺第五，落後第四嘅曼聯4分。由於今個星期森林同列斯聯都攞到分，如果李斯特城唔能夠全取3分，護級形勢就岌岌可危。利物浦雖然連贏六場，但爭前四處於被動位置，必須先攞晒餘下幾場嘅分數，再等第三第四位失分。首循環利物浦主場贏2:1，3個入球都由李斯特城包辦(包括Faes兩球烏龍波)。兩隊今季都以攻代守，相信會係一場入球show。

李斯特城上場作客大敗比富咸3:5，入咗2球嘅Barnes就坦然冇心情慶祝入球，佢認為對利物浦呢場波，將會係球會史上最重要嘅一場。其實李斯特城今季入球數字同曼聯相若，所以唔算少，只係失球太多，前面入多多都唔夠後面輸。對上一場能夠保持清白之身嘅聯賽，已經係世界盃前嘅事，而且近八場只係贏咗一場，個勢絕對反映咗喺聯賽榜上。Barnes聯賽嘅12球佔全季嘅三份一，而Maddison亦入咗10球。Vardy近期亦為護級博晒命，喺現役英超球員中，除咗Kane之外，對利物浦入波最多嘅就係Vardy，近四場佢亦有2個入球同1個助攻。李斯特城要對住防守仍然麻麻嘅利物浦，就要靠佢哋幾個食糊。自Smith領軍後，球隊控球時間減少，直接攻門次數多咗，反擊時主要靠Maddison製造入球機會。

利物浦進攻上近況最好嘅係Salah，八場入咗7球，今季聯賽以19球排神射手榜第四。今季利物浦作客個form好差(5勝4和8負)，不過近三場作客就2勝1和。聯賽連赢六場，雖然其中五場都係僅勝一球，但海鮮咗大半季，到季尾總算搵到方法贏波：由對阿仙奴嗰場開始，攻強於守嘅Alexander-Arnold推上中場，七場已經取得6個助攻。無論助攻，喺對手半場嘅傳送，呢七場計，佢都係聯賽第一。利物浦中場來季需要大換血，佢改踢新位置，可能為買人比較手緊嘅利物浦慳唔少錢。只係新陣式有辣有唔辣，而家右後防經常出現更多空位，Konaté防守範圍要更大，而Robertson亦需要做埋中堅，佢哋要特別提防李斯特城嘅反擊。