27/04/2023 曼城 vs 阿仙奴 - 賽前分析

足球資訊 | 英格蘭超級足球聯賽(2022/23) | 發布日期: 26/04/2023

排名: 曼城(2) vs 阿仙奴(1)

主隊近況: WDWWWWWW

客隊近況: DDDWWDWD

對賽往績: 曼城勝(7)-和(0)-阿仙奴勝(1)

三星期前，阿仙奴仍然冠軍在望，本來呢場大戰前有機會帶住雙位數迎戰，可惜連和三場之後優勢漸失，而家只係領先5分，而且比對手踢多2場。爭冠經驗相當豐富嘅曼城，喺幾條戰線上球員越戰越勇，佢哋已經所有賽事連續16場不敗，主場11連勝，而阿仙奴雖然都12場不敗（其間只係歐霸互射十二碼俾史砵亭淘汰）但上場敗仗就正係聯賽主場輸比曼城1:3，今季喺足總盃作客曼城亦曾0:1敗陣。睇返往績，阿仙奴未贏過Guardiola帶領嘅曼城。數據上阿仙奴係輸晒，不過上場對榜尾修咸頓，佢哋落後時拼命追和，爭勝心不減。面對逆境就更需要自強，如果可以踢返場爭氣波，話唔定會成為奪冠轉捩點。

去到季尾，阿仙奴個勢明顯滑落：領先之下比人追和，後防出錯，龍門派膠，門前失機，整體上失去以往嘅流暢度，球員嘅精神面貌亦同早前有好大分別。可能係大部份主力都較年青，未有爭標經驗。去到季尾最關鍵嘅時間，比曼城逼到埋身時，壓力令球員踢到患得患失。Arteta就嘗試為球隊減壓，話呢場唔係終極一戰，但需要有完美嘅表現，如果要奪冠，就要擊敗所有對手。呢場中堅主力Saliba，仍然因背傷休戰，近5場聯賽佢缺陣時，阿仙奴每場都有失球。而中場硬漢Xhaka身體抱恙，未知能否上陣。

Guardiola就反而話當呢場係決賽，贏嘅話就令佢哋更能掌握主導權，希望球迷可以早啲到場支持球隊。雖然佢提到曼城球員已經疲態畢露，但睇返歐聯對拜仁同足總盃對錫菲聯，佢哋都可以輕輕鬆鬆過關，大家應該唔係好覺啲球員有倦意，可能同佢哋板凳嘅深度同質素有關。隊內識戴帽嘅除咗入球機器Haaland，仲有喺歐聯兩場對拜仁都未有上陣，對錫菲聯一出嚟就入咗3球嘅Mahrez。呢場星期日輪休嘅De Bruyne同Rodri估計會正選上陣，但Guardiola就未有透露，對拜仁次回合時大腿後肌拉傷，中堅Ake嘅狀況。