14/01/2023 曼聯 vs 曼城 - 賽前分析

足球資訊 | 英格蘭超級足球聯賽(2022/23) | 發布日期: 14/01/2023

排名: 曼聯(4) vs 曼城(2)

球賽方向: 曼聯讓球[+0.5/+1]

近年嘅曼市打吡，曼城總被認為係較強勢嘅一隊，事實上近三次對賽曼城全勝，去年十月份曼城以無敵嘅姿態主場贏6:3，Foden同Haaland都戴帽，hat-trick波都唔夠分。半場領先4:0時，唔少曼聯球迷已經冇癮咁離開球場。但呢場之後，曼聯就越戰越勇，聯賽只係輸過1場，反而曼城就輸咗2場。以曼聯嘅近況同球員嘅精神面貌黎講，絕對有機會喺主場報一箭之仇。如果曼聯今場贏波，喺聯賽榜就會同曼城拉近到只差一分，兩隊絕對係要為面子同分數而戰。

曼聯自從11月初輸過比維拉1:3之後，聯賽已經連續贏咗四場，僅失1球。近期嘅成績咁好，除咗防守穩健之外，進攻上Rashford今季著晒火，由世界盃開始已經入球停不了。聯賽盃八強對查爾頓，後備入替仍有兩球進帳，協助球隊贏3:0晉級。佢最近6場賽事入咗7球，今季共踢咗25場，已經有15個入球同6個助攻。近況大勇嘅曼聯，近8場賽事全勝，領隊Ten Hag冇因此而鬆懈，認為對戰同市宿敵，最重要係有爭勝心，要盡力先有機會贏。

同係聯賽盃，曼城就遭遇滑鐵盧，爆冷輸咗比修咸頓0:2被淘汰出局。呢場早段收起咗Haaland同De Bruyne，輸到0:2先後備換入。最後曼城雖然全場控球率達72%，但7次埋門都冇一球中龍，係自從2018年歐聯0:3輸俾利物浦，275場比賽以來，第一次全場都冇中龍嘅射門，入球機器Haaland亦已經連續2場冇波入。三日前先喺足總杯大勝車路士4:0，聯賽杯就踢得咁差，Guardiola好老實咁講，如果對曼聯時仲係踢成咁，唔使旨意會贏。Guardiola出咗名大賽時先玩轉陣式，佢曾經透露嚟緊對曼聯，有啲特別嘅諗法，唔知今次會唔會又諗多咗呢？

雖然曼聯來勢洶洶，但唔係冇隱憂，右閘Dalot大腿受傷，會缺席打吡戰，而Martial星期五有操練，軍醫會評估情況，星期六先決定佢係咪可以上陣。Van de Beek就剛接受完膝蓋手術，今季已經收咧。