20/10/2022 曼聯 vs 熱刺 - 賽前分析

足球資訊 | 英格蘭超級足球聯賽(2022/23) | 發布日期: 20/10/2022

排名: 英超(5) vs 英超(3)

球賽方向: 熱刺讓球 [0/+0.5]

直播資訊: NowE/NOW621

上場聯賽曼聯只能0:0賽和紐卡素，喺奥脱福主場，全場只兩次射中龍。今季12場有3個助攻嘅Eriksen 因病缺勤，固然有影響，Ten Hag 話希望佢能夠喺週三復出，迎戰佢嘅舊球會熱刺。熱刺贏波的話，就會暫時壓過踢少一場嘅曼城升上第二。

對紐卡素開賽前，Ronaldo喺費格遜手中，接過射入職業生涯第700球嘅紀念奬項。呢場只係佢今季第二次聯賽正選上陣。全場佢將個波送咗入網兩次，但第一次係越位，第二次佢偷走對方門將腳下，當時準備開出嘅自由球而被判入球無效，佢喺向球證抗議時被罰黃牌。下半場被換出，直到坐返喺後備席，都被影到不斷搖頭，唔知係因為唔滿意自己嘅表現，定係唔想被換出。Ronaldo 喺剛剛星期一公佈嘅世界足球先生中排名20，係佢職業生涯中最低嘅排名。佢今季聯賽同歐霸只係各入咗1球，以上季總共入24球嚟講，今季因為坐多過踢，入球難怪少咁多。季前不斷傳出佢想轉會，但就未能成事，近期又再有傳聞，話佢要求一月離隊。

雖然唔知對熱刺時會否上陣，但Conte 覺得Ronaldo 任何時間落場，都會係一大威脅。今年三月嘅對賽，Conte仲記憶猶新，佢覺得球隊表現唔錯，但就係輸咗2:3比一個Ronaldo 嘅Hat-trick。

熱刺嘅Richarlison 對愛華頓時小腿肌肉受傷，有報道話佢可能因為咁而錯過世界盃。經過詳細檢查後，原來只需要休息兩星期，但嚟緊對曼聯就一定唔踢得。而Kane 已經為球隊連續五場聯賽入波，如果佢星期三對曼聯又有波入，將會成為熱刺史上連續入波場數最多嘅球員。呢場無Richarlison 同繼續養傷嘅Kulusevski，Conte有機會改踢3-5-2，同上場尾段一樣用Bissouma ，利用佢嘅護球，壓迫性，同控制中場嘅能力，希望能夠為前面製造多啲機會。