26/12/2022 李斯特城 vs 紐卡素 - 賽前分析

足球資訊 | 英格蘭超級足球聯賽(2022/23) | 發布日期: 26/12/2022

排名: 李斯特城(13) vs 紐卡素(3)

英超喺休戰個幾月後又開鑼，一開始就係快車期，真係戰意少啲都唔得。不過對於李斯特城同紐卡素嚟講，可能唔係問題。世界盃前，呢兩隊嘅狀態大勇，當然會希望延續之前嘅氣勢，乘勝追擊。紐卡素已經連贏5場，而家排第3，落後阿仙奴7分。李斯特城就由谷底反彈，近5場贏4場，只係輸咗比曼城，贏嘅4場仲係零失球，已經升上第13位。喺英超史上，拆禮物日失波最多嘅兩隊，原來就係紐卡素(44)同李斯特城(36)。

對上五季，紐卡素作客李斯特城贏咗三場，輸嘅兩場分別係大敗0:5同0:4。往績對呢場嚟講可能冇乜參考價值，因為佢哋今季脫胎換骨，近21年以嚟，第一次喺聖誕節坐喺聯賽榜頭3位。攻守平衡嘅紐卡素，聯賽15場入咗29球，入球數字喺聯賽第4，失球就同阿仙奴一樣，係聯賽最少(11球)。嚟緊呢場前鋒Isak嘅大腿傷患雖然已經復原，但狀態未夠，其他主要球員都能夠上陣，包括翼鋒Saint-Maximin。星期二喺聯賽杯對般尼茅夫時，佢只係後備上陣33分鐘，就令對手受制於佢嘅技術同速度，最後紐卡素贏1:0。而贏得十月份英超最佳球員同最佳入球嘅Almirón，預計亦會正選上陣。

李斯特城喺星期二晚嘅聯賽盃十六強，對米爾頓凱恩斯。射手Vardy以頭槌頂入赢3:0，佢喺世界盃前嘅聯賽杯踢咗2場，已經有3個入球，近況唔錯。而英超休戰前，以最佳狀態入選英格蘭國家隊，今季7入球4助攻嘅Maddison，最後因為小傷而缺席世界盃頭2場，最後3場亦都只係坐喺後備席，未有機會上陣。佢返到球隊未有踢聯賽杯，星期五亦冇參與操練，Rodgers話Maddison膝頭傷患一直未完全好返，醫療團隊會評估佢嘅情況。

兩隊踢完呢場， 1月9日又會喺聯賽盃八強碰頭爭入四強，今場會係前哨戰。