2025 F1揭幕戰澳洲站，就有傳Ferrari嘅模擬器結果同現場誤差太大，搞到要臨場改setting影響成績。嚟到第三站日本站，不論係「降班」揸番Racing Bulls嘅Lawson、接棒嘅角田裕毅，以至P2喺T1大炒車嘅新人Doohan……全個weekend嘅話題無不同F1模擬器拉上關係。

#1 Doohan日本站嘅意外源於模擬器唔夠準？

在2025年日本站，Alpine車隊新秀Jack Doohan喺第二節練習（P2）發生意外，事後F1模擬器（simulator）卻成為主角。事關Doohan原來平時用模擬器練習時一直習慣唔會喺入彎前手動關閉DRS（賽車減速時DRS會自己識得跟住閂，但鈴鹿賽道第一段DRS尾位兼T1吊詭在未洗減速就入到）。喺模擬器練習階段，Doohan既冇養成手動關閉DRS嘅習慣，而模擬器嘅feedback亦話佢知喺DRS on嘅情況下賽車係可以安全殺入T1。第一個flying lap Doohan成功過關，去到第二個圈Doohan食過番尋味以更高速度殺入T1，今次就出現咗模擬器冇話到俾佢知嘅結果：原來係會炒車。

#2 點解車隊、車手會咁依賴模擬器？

F1模擬器技術近年喺精確度、真實感兩方面都取得顯著進展，當今嘅模擬器可以提供更細緻的賽車動態反饋，並能夠模擬多種嘅賽道環境俾車手預先習慣。加上近代F1對正賽以外嘅測試次數限制多多，模擬器則既能夠提供即時反饋、又等車手可以喺安全情況之下盡量多試各種調整，長遠可以更有效率地協助賽車aero方面嘅開發，因此模擬器已成為各大車隊備戰同開發嘅重要工具。幾乎所有頂級賽車隊都已將模擬器納入訓練體系，支出郁啲就係幾百萬英鎊，小道消息甚至提到最少有一支F1車隊嘅模擬器洗費已突破1000萬鎊大關，一切都顯示模擬器喺F1賽車備戰上嘅重要性同普遍性。

#3 角田裕毅喺日本站未揸得掂RB21，係俾模擬器「陰咗」嗎？

「原籍細牛」Racing Bulls嘅角田裕毅趁Lawson被換，乘勢升上大牛駕駛RB21主場出擊。佢喺P1表現唔錯，但偏偏去到P2先後因人哋炒車、草地著火出示咗四次紅旗，角田未能為最軟嘅紅胎做出有參考價值嘅排位賽模擬結果，亦間接導致人、車都喺排位賽無法充分發揮潛力，只落得排Q2出局嘅失望結果。

喺角田臨時改揸RB21出戰之前，角田都有啲輕率咁爆咗句「用模擬器揸RB21未見得好難」嘅豪言壯語，一度令唔少支持者FF佢可以極速接過RB21呢枝人所共知（除咗韋少Verstappen）嘅「火棒」，不過角田真跑過後應該都知瀨嘢，佢指出RB21真車帶俾車手嘅反應「超出佢預期」，亦即係佢事前用模擬器練習係有偏差。

#4 F1模擬器嘅局限性在於邊度？

儘管模擬器優勢極為明顯，佢喺某啲方面仍存在局限性，例如係高速、複雜嘅空氣流動情境，又或者F1賽車踩brake先造得出嘅瞬間減速，現時就算係最頂尖嘅模擬器都仍然未能將真車呢啲feedback完美重現，所以大家會見到老一輩嘅車手例如Hamilton喺Mercedes年代就好抗拒揸模擬器（轉會Ferrari後認命惡補則係後話）。而新一代車手依家咁靠模擬器儲經驗，當模擬器效果同現實嘅偏差有番咁上下大嘅時候，車手喺真實賽道上嘅反應同表現受到影響聽落又似乎好合理。

由此可以再引發聯想：Lawson會唔會只係因為模擬器經驗與實際賽道反應唔協調導致戰績低下、無辜換嚟火速「燉冬菇」遣返番細牛嘅下場？但事情發生咗就冇得逆轉，現時馴服RB21嘅重責已輾轉落喺韋少以外「紅牛系」年資最長嘅角田身上：角田用模擬器操練RB21嘅日子暫時都唔算多，但佢將會有足夠時間拉近模擬器與真車感覺之間嘅差距（先假設Red Bull礙於面子唔會再喺今季換人啦……）。