一級方程式賽車-2026引擎規例

賽車資訊 | 一級方程式技術分析 | 發布日期: 18/08/2022

FIA啱啱公佈2026年引擎規例，改動包括移除熱能回收系統(MGU-H)、燃油流量由每小時100公斤下降至70公斤、全面使用生物燃料，同時增加動能回收系統(MGU-K)輸出，令到動力單元保持過千匹馬力輸出。

紅牛車隊既領隊Christian Horner曾經講過宜家每套動力單元大約200萬美金，熱能回收系統(MGU-H)佔當中大約一半。呢個成本加上高昂既研發成本令到唔少想加入F1成為引擎供應商既車廠卻步。為左吸引更多車廠加入，賽會聯同其他車隊決定係2026年推岀全新既引擎規例。除左使用100%永續燃料/引入引擎cost cap，最大既改動就係完全移除成本高、研發難道大既MGU-H。

一般家用車引擎既熱效率大約為35%，平治2019年PU既熱效率高達51%。要提升熱效率既方法就係減少能量既浪費。宜家既引擎規例下有2組能量回收系統，分別係動能回收系統(MGU-K)、熱能回收系統(MGU-H)。動能回收系統負責回收剎車既能量浪費，並轉化成為電力。原理相對簡單。相反熱動回收系統就比較複雜。引擎既原理係透過燃燒燃料產生機械功推動賽車，不過燃料既既化學能係冇可能100%轉換成機械功，所以過程中大部分能量會變成熱能排岀造成浪費(廢熱)。MGU-H既原理就係透過廢氣推動渦輪，再透過MGU-H轉換成電能。同時因為廢氣中既部分能量轉換成電能，令到廢氣既温度下降，減少排放。透過MGU-H/MGU-K所產生既電能就可以重新轉換成機械功，配合引擎為賽車提供動力。

MGU-H安裝係引擎上，周邊既温度高達600度，又要抵受渦輪既高壓力/高轉數，同時維持高效率。所以對於材料既要求好高，導致研發成本佔動力單元既一半。雖然新規例完全移除熱能回收系統，不過就會加強動能回收系統，最高提供350千瓦既電力輸岀。新既引擎規例令到成本下降，吸引到更多既車廠係2026加入，加強車隊之間既競爭。