本田2021年宣佈退出F1，過唔夠兩年就宣佈夥拍Aston Martin征戰2026年F1。紅牛領隊Horner早前公開呻過：Honda當年唔係嗌走，我哋洗鬼自己搞RBPT！當時Honda決定退出，官方俾出嘅原因就係佢哋要全力搞碳中和，當時佢哋已經準備好晒新燃料、新電池，一切就係為全廠上下達到碳中和嘅目標作衝刺。勢估唔到一年過後F1先至公佈2026年新賽制包括埋採用100%「可持續燃料」（sustainable fuel，以下統一叫「碳中和燃料」），毫無疑問F1呢則遲來嘅消息仍然係產生咗巨大影響力，正如Honda因為要搞碳中和而走，亦因為要練成終極嘅碳中和技術而「重返」F1。

之所以話F1遲咗推行可持續燃料，皆因環顧各大賽事，都已經見到唔少「碳中和」、「可持續」燃料嘅蹤影：WRC、IndyCar早喺呢兩年已先後改用可持續燃料，前者係用生物燃料（biofuel）溝合成燃料（synthetic fuel），後者則係採用85%嘅生物乙醇（bio-ethanol）混合15%其他嘅可再生成份（稱為E85），就連剛剛完成嘅2023年Le Mans，亦轉用由葡萄酒殘渣製成嘅 100% 可再生燃料。大家各施各法，而大方向就係：使用可再生能源製作、從生產到排放夾埋係冇製造更多嘅碳排放（所以唔好以為跑起上嚟會做到「路上零排放」），就符合到「碳中和」、「可持續」嘅定義。

反觀F1，引入生物燃料步伐比原定嘅落後咗，2022年就只係做到汽油中嘅生物乙醇比重由5%提升到10%（即由所謂嘅E5上到去E10，而且餘下成份仍然係化石燃料），到後來F1話2030一下之跳入100%可持續嘅行列，外界可以話又驚喜又懷疑。懷疑嘅係究竟F1話會用到嘅「100%可持續燃料」會係邊一種？現時好多外媒報道時都直接話F1會用嘅係「eFuel」（Electrofuel，電子燃料），我哋會認為唔適宜咁早下定論住，事關正宗嘅eFuel係涉及「能量轉換成氣體」然後「氣體轉換成汽油」兩大步驟，前者需要先將電能儲存到氫入面，後者則係將呢啲氫同碳結合變為汽油，期間動用到嘅電同水都需要來自可再生能源，成個package圍埋條數先至可以做到碳中和。而F1一直到而家都只係宣佈過「2026年用100%可持續燃料」，吹風亦只係話能源可以嚟自碳捕捉、生活廢料、非食物嘅生物質等等，細節欠奉。加上可持續燃料、化石燃料嘅化學成份分別不大，所以就算F1已經規定咗2026年燃油嘅成份都唔代表到啲乜，F1最終用嘅燃油稱唔稱得上eFuel，就要等待F1進一步披露細節。

既然乜都未定實，內燃機（ICE）呢一部分還有咩好討論呢？首先應該留意番2026年新例對燃油嘅限制換咗新嘅表述方式，改為限住每小時注入不多於3,000 兆焦耳能量嘅燃油入ICE，換算成重量就係大約每小時65公斤，同現時相比即係少咗1/3左右。同時間ICE馬力輸出預計會由現時嘅850匹減到去470匹嘅水平，達到油、電馬力輸出均等嘅局面，而最終條數係唔係符合預期，就好視乎新開發嘅燃油性能唔能夠保持得番現時E10燃油咁上下水平嘅功率。另一方面，F1中人不嬲出名多計，Horner面對sustainable fuel亦都有感而發：佢諗到既然2026嘅燃油係零排放，即係唔使再擔心食油會俾人鬧唔環保，咁未來V8、V10甚至V12嘅多汽缸、大馬力引擎又有冇機會重生呢？Horner至少肯定嘅係，Honda今次未走即回，證明咗ICE未死得住。