2022年既巴林賽前測試，Mercedes展示左一部接近無側箱既W13。雖然賽車既表現未算岀色，不過就已經反映岀平治對冷卻系統既認識已經超出其他9支車隊。

自2014年F1進入混能時代，空氣經壓縮後進入引擎，壓縮後既空氣溫度上升至攝氏200-240度，但同時高溫係不利於與燃料混合燃燒，因為高溫會令空氣密度下降，影響空氣參與燃燒既數量，同時壓縮空氣有可能導致不受控既燃燒，造成爆炸。因此大部分車隊會採用熱交換器（heat-exchangers），透過側箱既進氣口帶走壓縮空氣既部分熱能，令到壓縮空氣進入引擎燃燒室時溫度下降至55度左右。為左提升散熱能力，車隊往往要使用較大既熱交換器，結果導致車身既側箱偏大，犧牲左部分氣動力效能。

要進一步改善散熱系統，就要比較唔同冷卻劑既比熱容（specific heat capacity)。比熱容用作表示物體吸熱或散熱能力，比熱容越高，物體的吸熱或散熱能力越強。相較於空氣既比熱容只得993 Jkg-1K-1，水既比熱容為4200 Jkg-1K-1，即係水既散熱能力比空氣既散熱能力高出4.2倍，所以電腦用水冷散熱器既散熱能力會比採用傳統風冷散熱器好。至於氦既比熱容更係去到5190 Jkg-1K-1，吸熱/散熱能力比水更出色，因此氦經常被用作超低溫冷卻劑。

W13既窄側箱設計得利於先進既冷卻系統。Mercedes透過與英國航天科技公司Reaction Engines合作，將該公司既火箭引擎既冷卻技術引入F1。火箭引擎既氧氣經過壓縮後可達上千度，係進入燃燒室前會經過預冷卻器。預冷卻器中裝有大量冷卻管道，管道中注入氦氣。當高溫壓縮空氣經過預冷卻氣時，温度瞬間下降至室溫溫度。W13採用相同原理既冷卻器。對比起傳統既空氣/水冷卻器，W13既冷卻器尺寸更細，有效減低側箱既體積之餘，更可以進一步降低壓縮空氣既溫度，提升引擎效能。Mercedes呢個冷卻設計可以話已經超前其他車隊好多。