03/04/2025 利物浦 vs 愛華頓

足球資訊 | 英格蘭超級足球聯賽(2024/25) | 發布日期: 02/04/2025

比賽日期	主隊	客隊	主勝機率	和局機率	客勝機率
2025-04-03 03:00	利物浦	愛華頓	74.6 %	16.7 %	8.8 %

主勝機率	和局機率	客勝機率
74.6%	16.7%	8.8%

排名: 英超(1) vs 英超(15)

默西塞德郡打吡(利市打吡)，利物浦同愛華頓兩隊死敵，每次交手都火藥味濃又充滿戲劇性。首循環因打風延期到二月，愛華頓主場喺補時最後一分鐘射入2:2扳平。杜古希(Abdoulaye Doucouré)走向客隊球迷前慶祝，居迪斯鐘斯(Curtis Jones)上前阻止，雙方繼而起訌，場面混亂，完場後史洛向球證激動握手，再以不當言論指責球證團隊，兩個球員同利物浦正副領隊各領一紅。英超對賽史上，派紅最多嘅就係利市打吡(25個)，其中愛華頓佔17個。

利物浦喺國際賽期前，一星期內先喺歐聯被PSG淘汰，繼而聯賽盃決賽輸比紐卡素，士氣跌到今季谷底，國際賽期正來得及時，球員可以休養生息。雖然幾個正選球員喺國家隊受傷，提早返回利物浦，包括對哥倫比亞時腦震盪嘅艾利臣(Alisson)，近幾場帶傷上陣嘅加芬比(Ryan Gravenberch)同對克羅地亞時輕傷嘅干拿迪(Ibrahima Konaté)。史洛表示球員國際賽期後有幾日休息，呢幾個球員預計都能上陣。最令利物浦頭痛嘅係阿諾(Trent Alexander-Arnold)嘅受傷，逼選右閘干拿巴特利(Conor Bradle)只係剛復操。缺少右閘嘅聯賽盃決賽，紅軍右邊如自斷一臂。

愛華頓喺莫耶斯執教後，曾經有回勇跡象，贏水晶宮之後連續四場賽和，對狼隊同韋斯咸賽果更令人失望。雖然降班就唔輪到佢哋，走勢又再有向下跡象，莫耶斯會期望國際賽期可以幫助球隊回穩。伊利文安戴耶(Iliman Ndiaye)今季曾經為球會射入重要入球，養傷兩個月後終於恢復操練，未知能否趕及復出。米哥倫哥 (Vitaliy Mykolenko)為烏克蘭上陣時大腿受傷，莫耶斯表示希望佢能夠喺大戰上陣。

兩隊踢法嘅分野，令賽事更加可觀：愛華頓今季嘅41%入球來自死球，為英超之冠，對手利物浦嘅死球入波只佔6%，為英超最少。

利物浦雖然盃賽接連失利，聯賽就相對穩定，過去七場取得五勝二和，反觀愛華頓，喺莫耶斯上任後九場聯賽保持不敗，但其中五場只能和局收場。莫耶斯亦似乎唔識喺晏飛路贏波，唔只近九場作客晏飛路敗陣，更係從未贏過。論對賽往績，利物浦有打吡主場優勢，近三場都贏2:0。利物浦今季英超29場中有26場入最少兩球，如果呢場再入兩球，將創造新英超紀錄。

分類:

足球資訊

03/04/2025 利物浦 vs 愛華頓

分類:

標籤:

關於我們:

快速連結:

聯絡我們: