阿仙奴喺國際賽期後激戰連場，先喺北倫敦打吡對熱刺，歐聯對歐霸冠軍亞特蘭大，幾日後又有榜首大戰要對死敵曼城。上季曼城主場對阿仙奴，踢咗一場緊湊但娛樂性不高嘅賽事。曼城喺七成控球權下，兩隊只製造咗3個中目標嘅射門，最後0:0和局收場，呢場係曼城58場主場賽事第一次被零封。賽後阿迪達被批評踢得太保守，搏一搏就有機會變成三分差距，話唔定上季已經封王了。當然世事無如果，起碼今季阿仙奴仲有足夠嘅爭標實力再黎一次。

 

呢場大戰兩隊都有中場主力養傷，阿迪達透露，奧迪哥特(Martin Ødegaard)足踝受傷需要養傷一段時間，而迪布尼(Kevin De Bruyne)喺對國際米蘭下半場因傷退下火線。

 

北倫敦打吡戰，阿仙奴主力迪勤懷斯(Declan Rice)，奧迪哥特，卡拉費奧利缺陣(Riccardo Calafior)缺陣，阿迪達加重防守穩守突擊，憑藉死球由加比爾(Gabriel Magalhães)頂入，英超史上首度作客熱刺三連勝。歐聯面對亞特蘭嘅體力化同嘅壓迫踢法，加上主場氣勢，阿仙奴整場攻勢疲弱，攻門次數不多，欠缺中場發電機奧迪哥特，連續兩場都失去上季進攻上嘅強度同流暢度，加上星期日就榜首大戰，阿仙奴比對手少一日休息，歐聯雖未見留力，始終有後顧。打吡戰屢救險球嘅拉也(David Raya)今場成為球隊英雄，撲出對手嘅十二碼後，白界線上再救出對手嘅補射。

 

哥迪奧拿嘅賽前記招，對傷病排陣嘅重要資訊一向都答得虛無縹緲。今次被問及迪布尼嘅傷勢，佢只係回答未知星期日能否上陣。曼城近況最好嘅肯定係入球機器夏蘭特(Erling Haaland)，聯賽首場入2球，之後兩場戴帽，到第四場對車路士雖然僅僅入1球，但今季聯賽總入球已經達到9球。以為佢會帶住大勇姿態硬撼國際米蘭，最後只得三次射門一次中龍，今季首次食白果。睇返啲數據，夏蘭特過去五場歐聯只入1球，以致俾人話佢只會喺對弱旅時屈機同刷數據。呢場歐聯曼城22次攻門都未有入球，賽後哥迪奧拿亦大讚國際米蘭防守紀律高，嚟緊呢場死敵阿仙奴，作客亦會先鞏固防守，務求唔失分。