坦夏曾揚言要終結哥迪奧拿同高普嘅英超世代，如今高普時代已完結，雙紅會變成兩個荷蘭籍教頭嘅戰場。坦夏談及加盟曼聯，係要接受為球隊重建嘅挑戰，並認為以當時球隊嘅情況，工作比史諾艱巨。重組中嘅曼聯亦不泛代表作，上季對紅軍兩場聯賽都和波，足總盃就踢利物浦出局，最後仲贏同市死敵捧盃而回。球隊狀態就算幾不濟，去到關鍵之戰，球員戰意總係特別高昂同有超水準演出。今季嘅利物浦新人事新踢法，季前熱身賽曾經3:0大勝曼聯，史諾呢場係咪能夠繼續贏波同保持清白之身，就要考吓佢嘅功力。

 

利物浦喺夏季轉會窗一直只出冇入，眼見其他球會積極增兵，唔少利迷都憂心忡忡，皇家蘇斯達防中蘇比文迪(Martín Zubimendi)決定留隊，球迷失望之時球會突然簽入喺歐洲國家盃表現出色嘅格魯吉亞門神馬馬達舒韋利(Giorgi Mamardashvili)，今季以外借身份留喺華倫西亞，隨後更有由祖雲達斯轉會嘅上屆意大利歐國盃奪標功臣基艾沙(Federico Chiesa)，為本來已經人才濟濟嘅鋒線加強板凳深度。呢場基艾沙應該未能趕及上陣，球迷要睇到佢嘅風采就要再等一等。利物浦求防中不果，史諾就安排加雲貝治(Ryan Gravenberch)踢六號位，除咗防務工作做足，佢亦努力做串連，上場對賓福特，佢嘅重要傳送次數係全場最多。史諾要求球員避免做風險大嘅傳送，寧願慢慢做波等機會，利物浦唔再踢逼搶，亦唔急於進攻，改善咗上季急攻時頻頻門前失機嘅情況。

 

坦夏2022剛上任首場輸比白禮頓，第二場主場硬撼利物浦贏2:1，今個星期亦係白禮頓敗杖之後回主場作賽。曼聯有個令球迷滿意嘅轉會窗，幾個重點收購之後，大有機會會重返前四之列，三個新兵中堅迪列治(Matthijs de Ligt)，轉會窗關上當日加盟嘅PSG 防中烏加迪(Manuel Ugarte)，前鋒約舒亞舒克斯(Joshua Zirkzee)唔只為球隊帶嚟動力同硬淨度，亦可能係球隊重建嘅重要一步，成為球隊前中後三環嘅脊椎。上星期作客對白禮頓喺補時階段時球隊防守不集中，走漏祖奧柏度(João Pedro)以致再晚節不保，曼聯今次一定希望藉主場之利贏波。華舒福(Markus Rashford)雖然聯賽兩場都零中龍，但以往對賽利物浦，佢憑速度同個人突破能力經常有入球。史諾下嘅利物浦，經常能成功裝越位，曼聯打反擊嘅時候要特別注意。