夏維斯有冇用？拗咁耐都係嘥氣！

足球資訊 | 英格蘭超級足球聯賽(2024/25) | 發布日期: 13/02/2025

阿仙奴先前5:1大破曼城，不論喺德國隊抑或阿記都俾人質去踢假9嘅夏維斯（Kai Havertz）儘管貢獻咗入球、助攻各一個，不過大家仍然好在意佢嘅失機。嚟到今日大家已唔洗再為夏維斯爭論喇！呢位今季喺英超射入9球、歐聯射入4球嘅「偽前鋒」喺阿仙奴遠赴杜拜搞嘅集訓營中整傷腿筋宣佈今季報銷。咪以為15個入波好少，當睇番今季阿仙奴成個統計大表，夏維斯就係廠隊呢刻如假包換嘅神射手，排第二嘅則係一早傷出嘅翼鋒布卡約沙卡。加上另一翼鋒馬天尼利同沙卡一樣都係最快四月再見，各大傳媒都好快幫阿仙奴數數手指：一隊中真正嘅「鋒」就得番左右兩邊同樣踏入30歲嘅杜沙特（Leandro Trossard）與及史達寧（Raheem Sterling），再跟住就已經要數到落會踢右翼嘅17歲小將溫拿尼（Ethan Nwaneri）（見圖）。

沙卡、加比爾捷西斯兩大前鋒受傷長抖，係老早已經發生嘅事，而阿仙奴教練阿迪達對外聲稱信晒夏維斯，固然係有欣賞到佢走位靈活、傳球意識等優點，但到咗冬季轉會窗關閉、阿記人員增加數量竟然係零，阿迪達都再難掩飾失落之情。

咁阿記又係唔係老定到咁呢？又唔係嘅，只不過又係喺轉會市場撞到焦頭爛額，例如大想頭到問阿士東維拉斟當家前鋒奧利屈堅斯（Ollie Watkins）（有傳係阿仙奴交唔出6000萬鎊，亦有傳維拉臨到歐聯分組賽尾場生死戰先收到阿記報價，火都嚟埋）、嘗試問AC米蘭借莫拉達（Alvaro Morata）又卡關（莫拉達最終被外借加拉塔沙雷），到走到去德甲問拜仁借馬菲斯泰利（Mathys Tel），泰利竟然揀咗去同市嘅熱刺救火都唔揀阿仙奴。

就以4月1日為界、假設沙卡及馬天尼利按計劃傷癒復出、國際賽檔期又過埋，在此之前阿仙奴總共要踢5場英超（先唔好理兩場對手未知嘅歐聯十六強），而三月中國際賽前更先後要面對諾定咸森林、曼聯、車路士，其中對車路士呢場史達寧因為係對手借將而冇得倒戈，阿仙奴前線人選將更加枯竭。到時要向自己青訓梯隊埋手嗎？U21嘅Kabia、Butler-Oyedeji都只係叫做喺正賽坐過板凳，阿迪達斷估唔會敢放佢哋去打森林打車仔。咁會唔會考慮簽自由身球員呢？英媒又好快幫阿記整理名單：28歲前烏拉圭國腳Maxi Gómez、31歲已經俾西維爾放棄嘅Mariano Diaz、更有上季踢摩納哥喺法甲射入16球，但因性侵案被判緩刑嘅34歲法國前鋒Ben Yedder......咁不如都係等睇阿迪達嚟緊對李斯特城、韋斯咸個佈陣有咩端倪會實際啲。（Sky Sports圖片）

分類:

足球資訊

夏維斯有冇用？拗咁耐都係嘥氣！

分類:

標籤:

關於我們:

快速連結:

聯絡我們: