10/03/2025 曼聯 vs 阿仙奴

足球資訊 | 英格蘭超級足球聯賽(2024/25) | 發布日期: 08/03/2025

比賽日期	主隊	客隊	主勝機率	和局機率	客勝機率
2025-03-10 00:30	曼聯	阿仙奴	21.2 %	25.3 %	53.5 %

主勝機率	和局機率	客勝機率
21.2%	25.3%	53.5%

排名: 英超(14) vs 英超(2)

曼聯主場出戰阿仙奴，主隊聯賽表現令人擔憂，目前排第十四，過去十場聯賽僅贏得三場(葉士域治，富咸，修咸頓)。阿仙奴近期表現相對穩定，雖然近兩場都未能打開勝局，仍然穩守第二、繼續保持爭標機會。兩隊上次對碰係一月份足總盃第三圈賽事，阿仙奴亦因而緣盡足總盃。

今季曼聯主場弱勢，球迷亦對管理層不滿：負債纍累要職員埋單，又裁員又削減員工福利，加上門票加價，部份球迷忍無可忍，發起喺呢場大戰前喺球場外着黑衫抗議，示意球會正趨向死亡。場內成績亦比坦夏時代倒退，過去兩季都有盃落袋，上星期日就互射十二碼失左足總盃。周中歐霸作客皇家蘇斯達，亦只能賽和1:1。傷兵多，落場嘅球員如海倫(Rasmus Højlund)就越踢越冇信心，自12月以來未有入球。造就同鄉年青鋒將奧比馬田 (Chido Obi-Martin)上位機會，原係阿仙奴青訓產品，只得17歲，身型強壯，盤紐技術精湛，為鋒線帶嚟活力同創造機會，喺對富咸一杖雖然上陣只52分鐘已經有三次射門，阿迪達亦對未能留住佢感到無奈。海倫狀態低沉，而奧比馬田未有入選歐霸大軍得到休息，如果阿摩廉對佢投以信任一票，將有機會對返母會做奇兵。

同樣係傷兵滿營嘅阿仙奴，亦係時勢造英雄，17歲嘅小將，被喻為「新金童」旺拿尼 (Ethan Nwaneri)嘅亮眼表現，大有機會入選英格蘭大軍。周中阿仙奴對PSV 7 個1皮，旺拿尼成為歐聯淘汰賽歷史上年紀第三細嘅入球球員，今季佢已經入咗8球，無論喺大賽定歐聯大舞台都信心爆棚。阿迪達對佢嘅發展好滿意，期望佢表現穩定，可以喺奥脱福入波。另一位青訓出品18歲嘅左閘路易斯史基利 (Myles Lewis-Skelly)亦表現出色，對PSV同旺拿尼合作炮製咗個精彩入球。佢係今季聯賽閘位球員單對單地面對抗率最高嘅球員(74.2%)，只係有時太硬淨未懂收放，聯賽踢咗12場已經有兩張紅牌，周中對PSV早段領黃後，阿迪達為免又打少個就將佢收起。

兩隊都受到傷兵困擾，曼聯除咗原有嘅長期養傷球員之外，麥佳亞(Harry Maguire)同烏加迪(Manuel Ugarte)輕傷，估計未能趕及上陣。阿迪達表示，完勝PSV令球隊士氣大振。良好嘅精神狀態，將會係兩隊落場表現嘅分野，外憂內患嘅曼聯，將難以抵擋氣勢如虹嘅阿仙奴。

分類:

足球資訊

10/03/2025 曼聯 vs 阿仙奴

分類:

標籤:

關於我們:

快速連結:

聯絡我們: