北倫敦打吡可算係英超最激烈嘅打吡戰，熱刺對阿仙奴係英超史上對賽入波最多嘅兩隊，一落場就上演入球show。近十場北倫敦打吡，熱刺喺自己地頭贏過三場。主場個勢都唔錯，今次更多個主場之利，原因係兵工廠件紅白主場波衫太多白色，易擾亂球證視線，被英國職業球證公司PGMOL要求38年來首次著作客黑衫作賽。

 

阿仙奴上場對白禮頓只能賽和1:1，今季爭標形勢仍然緊湊下，大意失分就可免則免。今場迪勤懷斯(Declan Rice)停賽，佢係今季阿仙奴受壓下傳送成功率(97.1%)最高嘅球員，而上季成功傳球到對手禁區次數最多嘅英超球員奧迪哥特(Martin Ødegaard)喺對奧地利時足踝受傷。兩個正選中場同時缺陣，唔多唔少會影響攻守，加上今季新加盟嘅卡拉費奧尼（Riccardo Calafiori)又喺對法國時受傷，相比起上季，今季阿仙奴季初就要面對傷患問題，諸事不順下，領隊阿迪達續約三年，算係為球隊沖喜吓。熱刺嘅高位防守，有利於反擊板斧強勁嘅阿仙奴，夏維斯(Kai Havertz)同史達寧(Raheem Sterling)只需要一個機會，就可以致對手於死地。

 

按英國天空電視台嘅數據，熱刺喺樸斯迪哥高奧麾下，係全英超高位逼搶之冠，佢哋嘅壓迫踢法，往往令對手防線瞬間崩潰，不過有得必有失，高位防守亦成為佢哋最弱一環，所以開季頭三場熱刺表現未見穩定：被李斯特城追和，大勝愛華頓，作客對紐卡素就喺大好形勢下失機最後輸1:2。季前熱身賽司職偽9號嘅古魯錫斯基(Dejan Kulusevski)表現唔錯，但蘇蘭基(Dominic Solanke)加盟，就令到佢對李斯特城時要坐冷板櫈，蘇蘭基嘅受傷令佢再得到上陣機會，兩場都製造唔少攻勢。佢帶領瑞典擊敗阿塞拜疆同愛沙尼亞其間，致命傳送數字係頭兩場歐國聯賽事之首。

 

傷兵方面，熱刺中堅雲迪芬(Micky van de Ven)早前受傷現已復操。比素馬(Yves Bissouma)踢國家隊時受輕傷，就上陣成疑。