24/02/2025 曼城 vs 利物浦

足球資訊 | 英格蘭超級足球聯賽(2024/25) | 發布日期: 23/02/2025

比賽日期	主隊	客隊	主勝機率	和局機率	客勝機率
2925-02-24 00:30	曼城	利物浦	46.4 %	21.9 %	31.7 %

主勝機率	和局機率	客勝機率
46.4%	21.9%	31.7%

排名: 英超(4)vs 英超(1)

英超本週重磅大戰，兩隊喺周中失意/失分嘅球隊，將會展開一場惡鬥。曼城作客1:3敗於皇家馬德里歐聯出局，利物浦作客維拉賽和2:2。首循環利物浦主場2:0擊敗曼城，主場球迷高唱sacked in the morning時哥迪奧拿以六隻手指回應自己為曼城贏得六個錦標。聖誕過後曼城有新兵加盟開始反彈，所有賽事十三場八勝。利物浦二月份十五日踢五場嘅地獄式賽程踢完第三場後，作客愛華頓同維拉都係和局收場，狀態稍為滑落接連失分。兩隊每次對賽都係高手過招，緊湊又有娛樂性，今次雖然唔再係榜首大戰依然可觀。

埃及王子馬莫殊(Omar Marmoush)空降曼城，跟以往只能單打獨鬥嘅賀蘭特(Erling Haaland)合作越趨成熟。當賀蘭特引開對手，馬莫殊就有空位製造威脅。聯賽大炒紐卡素4:0時兩個殺手嘅精彩表現，令馬莫殊黎到英超上演首個帽子戲法。賀蘭特喺呢場受傷，哥迪奧拿賽前提到未肯定佢星期日能夠上陣。周中對皇馬喺賀蘭特缺陣下，沙維澳(Savinho)夥拍馬莫殊攻堅，成效未見突出，但呢個已經係短期最有效嘅對策。曼城面對攻守轉換快速嘅紐卡素，對手最後只有三次射門。球員傷患問題逼使球隊年輕化，正選有七個球員24歲或以下，再加上後備三個年輕球員，控球在腳以快打快，季初球隊老化嘅問題漸見轉機。

對手嘅埃及國王沙拿(Mohamed Salah)，踢法跟馬莫殊相似，一個打右一個打左，都係擅長進攻時同隊友走位配合。喺曼城身上取得入波加助攻最多嘅球員(8入球5助攻)就係沙拿。利物浦近期征戰頻頻，球員出現疲態，入球同失球數字都較季中差。對維拉時後備上陣嘅達雲紐尼斯(Darwin Núñez)面對空門炒高，其後疑似信心受影響，賽後史洛對佢門前失機後嘅場上嘅表現有微言，呢場會否正選上陣都係未知數。利物浦鋒線上雖然仲有迪奧高祖達(Diogo Jota)同迪亞斯(Luis Díaz)，但近期就「周身刀無張利」，門前失機頻頻，較穩定嘅加保(Cody Gakpo)輕傷，呢場上陣成疑，利物浦進攻時仍然要靠沙拿。

哥迪奧拿喺曼城執教生涯中，未試過主場輸俾利物浦。自一月以黎，曼城嘅射門轉化率達24.7%，同期利物浦只有12.4%，亦可見兩隊射門質素分野。利物浦雖然仍高踞聯賽榜首，但近期狀態不穩，近三場所有賽事作客未嘗一勝，要作客全取三分未能樂觀。

分類:

足球資訊

24/02/2025 曼城 vs 利物浦

分類:

標籤:

關於我們:

快速連結:

聯絡我們: