今季只能「轉戰」歐霸嘅曼聯、熱刺開季至今都未算對辦。上週曼聯賽和水晶宮後再跌一級，本來嘅第10位剛好就係今晚嘅對手熱刺進佔。今期曼聯主場表現so far只係一般，要延續近3季對熱刺嘅不敗紀錄（2勝1和）還需要一班球員生生性性。

坦夏星期三帶領曼聯面對自己出道嘅「愛隊」川迪，今季嘅歐霸首戰就只能1:1打成平手，幫球隊射入唯一入球嘅中場基斯甸艾歷臣（Christian Eriksen）賽後都話隊波心態唔係好妥。回顧番今季嘅正賽主場賽事，曼聯喺法定時間內就只能錄得2勝2和1負，其中英超第3週俾利物浦大炒三球，球隊嘅穩定性同後防表現都備受質疑，而喺對川迪之前，曼聯亦只能作客悶和水晶宮，論陣容完整度、論近況、論成績，曼聯嘅表現都仍未好俾到說服力，坦夏亦承認為曼聯入球量不足感到頭痛，但亦有幫加盟至今只入過一球嘅舒克斯（Joshua Zirkzee）護航，認為佢尚有能力「增產」。

熱刺喺英超嘅比賽成績暫時都唔係好得曼聯幾多，其中喺第3、4週接連輸俾直接對手紐卡素（作客1:2）、阿仙奴（主場0:1）就更係傷上加傷，如今只能暫居第10，僅僅比曼聯高出一位。熱刺儘管計埋週中對卡拉巴克嘅歐霸比賽已經連續贏番三場正賽，但亦都就係呢場比賽上孫興慜整親提前退下火線。到截稿呢刻「老孫」能否上陣都仍係個問號，而plan B普遍認為會係叫攻中古路錫斯基（Dejan Kulusevski）移左，而唔係歐霸入替「老孫」嘅添姆雲拿（Timo Werner）。

相關內容:

---