20/02/2025 阿士東維拉 vs 利物浦

足球資訊 | 英格蘭超級足球聯賽(2024/25) | 發布日期: 17/02/2025

排名: 英超(9) vs 英超(1)

直播資訊: Now 611/621, NowE

（劇透：今次主要講利物浦）

利物浦喺歐聯一舉拎下分組賽首名，近兩週嘅週中附加賽檔期唔關佢哋事，但就咁橋最終係兩個週中都冇得抖：上星期三用嚟補踢番第15週「默郡打吡」，而今個星期三忽然加插第29週嘅比賽，則因為利物浦打入3月中對紐卡素嘅聯賽盃決賽。維拉嗰邊教練艾美利詐晒型，大概係因為今季極不容易得到嘅連續三星期一週一賽，到頭來都係要嘔番一個出嚟。而且今次踢週中嘅對手更要係利記，單計英超近8場不勝（2和6負），雖然試過20/21球季瘋狂大勝7:2，維拉近10次英超對利記已係輸足8次咁多，亦難怪艾美利咁大反應。

利物浦冬窗冇新收購，暫時為止相比阿仙奴、車路士幸運，三線人齊之下更有七分在手，不過一星期前嘅默郡打吡補賽嘅過程同後話都幾值得深思。

以瘋狂跑動、激情風格聞名嘅高普求去，利迷都十分擔心下一任教練會點樣繼承高普打落嘅江山。公開嘅秘密係如果名宿沙比阿朗素say yes，就唔會有今日嘅史諾，但現實就係冇咁多如果，沙比夠膽繼續投資喺利華古遜，造就史諾接手利物浦。史諾高章之處係冇盲跟晒高普嗰套而改用較穩陣嘅打法，透過增加一對中堅喺組織攻勢時嘅參與程度，當隊波嘅球多要經過雲迪積克（Virgil van Dijk）以至拍檔干拿迪（Ibrahima Konate）腳下，對手想搶截嘅話自己條防線就會拉長，咁利物浦呢邊就可以把握空檔進攻，當失去控球時，今季改踢4-2-3-1打起咗嘅防中格雲貝治（Ryan Gravenberch）就夥拍麥卡里士打（Alexis Mac Allister）為一對中堅提供咗更佳屏障，變相整體係減輕咗雲迪積克嘅防守壓力，與此同時放空咗左右兩閘：今季到目前為止右閘阿歷山大阿奴（Trent Alexander-Arnold）、右翼沙拿（Mohamed Salah）幾項主要統計數字都已經接近上季全季總數。史諾「背離」高普嗰一套，反而緩解咗高普兩位愛將雲迪積克（33歲）及沙拿（32歲）年紀漸長帶嚟嘅隱患。

呢套行之有效嘅打法聽落好簡單，上半季就有18隊中嘅14隊倒喺利物浦鐵蹄之下，偏偏延期開戰嘅第19隊提供咗一次唔錯嘅示範。咁當然大可以話「默郡打吡喎，愛華頓平日點弱都搏盡為啖氣啦。」但又如果呢場第15週嘅戲碼當初冇因為惡劣天氣而改期、由番達治而唔係莫耶斯帶領愛華頓出戰，又能唔唔能夠踢得番上星期呢種氣勢呢？

莫耶斯嘅安排看似亦係十分簡單，就係切斷格雲貝治、雲迪積克之間嘅交流：當前鋒比圖（Beto）都用埋嚟主力mark格雲貝治、中場杜哥利（Abdoulaye Doucoure）喺格雲貝治、雲迪積克之間竄擾，格雲貝治背後再有兩個愛華頓中堅燒佢後欄，直接結果就係利物浦後防俾唔到波上中場，引發出利記今季一場最多嘅64次長傳，錄得本季最低觸球次數及傳球次數嘅格雲貝治亦喺60分鐘就已提早退下火線。

相比之下，場波最終2:2完場、正副教練都領紅（到出文呢刻都未有最終判罰結果）對利物浦都未必係最傷，嚟緊更值得觀望更係愛華頓出盡九牛二虎之力硬接利物浦嘅打法會唔會成為其他隊嘅教材：同一招中上游大隊未必願意放下身段使用（正例如嚟緊呢場嘅對手維拉，佢哋嘅前鋒、攻中組合本身已有好強嘅入球能力），但如果係一啲每一分都要搏盡嘅下游隊伍照抄愛華頓呢套，史諾又有冇其他板斧確保唔會喺佢哋身上失埋啲冤枉分？

喺剛過去嘅星期日利物浦作客排17嘅狼隊，仍等緊賽會發落嘅史諾仍可以臨場指揮，利記一如既往採取主動，亦毫不意外地先入狼隊兩粒，但下半場輪到狼隊中場一口氣換兩個前鋒反壓過嚟，疲態盡露嘅紅軍彷彿又見到愛華頓嘅影子。（英超X圖片）

分類:

足球資訊

20/02/2025 阿士東維拉 vs 利物浦

分類:

標籤:

關於我們:

快速連結:

聯絡我們: