27/01/2025 富咸 vs 曼聯

足球資訊 | 英格蘭超級足球聯賽(2024/25) | 發布日期: 26/01/2025

比賽日期	主隊	客隊	主勝機率	和局機率	客勝機率
2025-01-27 03:00	富咸	曼聯	45.7 %	25.1 %	29.3 %

主勝機率	和局機率	客勝機率
45.7%	25.1%	29.3%

排名: 英超(10) vs 英超(13)

曼聯上星期聯賽主場不敵白禮頓，賽後阿摩廉批評球員表現，激動之下打爛更衣室電視，其後喺記招話呢隊可能係球隊史上最差嘅曼聯。言行失控受到各方面嘅抨擊，佢回應話自己係個少帥，會有犯錯嘅時候。另一方面球會財政捉襟見肘，傳聞要賣年輕潛力球員加拿曹(Alejandro Garnacho)籌旗買人。少帥新官上任只兩個幾月，發現工作比想像中困難。還好呢個星期歐霸絕殺格拉斯哥流浪，鎖定附加賽資格，亦令阿摩廉成為曼聯史上第三位頭三場歐洲賽全勝嘅領隊，總算舒緩一點壓力。

曼聯今季對曼城，利物浦同阿仙奴戰績輝煌，對修咸頓只能臨完場前憑住阿麥迪亞路(Amad Diallo)連中三元，對白禮頓更無以為繼輸1:3。成績猶如坐過山車，同坦夏時代相似。事實上，阿摩廉仍未有自己班底，結果攻不銳守又不穩，對弱旅未能用傳控組織破密集，對強隊時依仍然靠打防反。而門將安拿拿(André Onana)表現不穩，對白禮頓時嘅嚴重失誤，亦打擊球隊士氣。呢場作客富咸，約賀(Leny Yoro)同迪列治(Matthijs De Ligt)周中輕傷被換出，呢場上陣成疑。

對手富咸最近表現相對穩定，近11場所有賽事只係輸過一場(和6場贏4)包括和阿仙奴同利物浦。上星期贏李斯特城2:0後，呢場全取3分嘅話，更能為下季踢歐洲賽舖路。值得注意嘅係今季上晒力嘅哈利威爾遜（Harry Wilson)，佢係英超2025年製造機會最多嘅球員(14)。而左閘羅賓遜(Antonee Robinson)今季助攻次數(9)，只僅次於蕯卡(Bukayo Saka 10)同沙拿(Mohamed Salah 13)。今季佢搭住伊和比(Alex Iwobi)攻堅，亦係富咸嘅一個殺著。

富咸過去18場英超對陣曼聯僅贏1場，而曼聯近8次作客贏咗7場。論對賽往績就曼聯佔優，但富咸信心同近況都有壓倒性優勢。少帥阿摩廉難免要再交吓學費，經驗同能力都繼續受考驗。

分類:

足球資訊

27/01/2025 富咸 vs 曼聯

分類:

標籤:

關於我們:

快速連結:

聯絡我們: