國際賽期過後迎來一場前四大戰，利物浦主場惡鬥車路士。兩隊今季喺新領隊帶領下都有唔錯嘅表現，尤其係車路士，今季有明顯進步。

 

利物浦最近6場英超對車路士保持不敗，但只得1場能打開勝局，其餘5場都鬥得難分難解未分勝負。利物浦開季較為順利，6勝1負只係失咗2球，得失求差係英超之冠。而對手車路士贏咗4場，同利物浦一樣只係輸過一場。

 

今場嘅焦點係兩位關鍵球員對碰：利物浦嘅加雲貝治(Ryan Gravenberch)同車路士嘅高爾彭馬(Cole Palmer)。加雲貝治喺今季脫胎換骨，狀態top fit，被認為係名宿韋拉(Patrick Vieira)同古烈治(Ruud Gullit)嘅混合體，佢嘅覆蓋範圍廣，往往能捕捉到對手傳球路線，攔截成功之後轉守為攻，亦有超強嘅護波能力。今季引球推進嘅里數，只僅次於曼城嘅高華域(Mateo Kovacic)。

 

車路士嘅攻力不弱，利物浦嘅中場需要貼身招呼進攻體系最重要嘅高爾彭馬。利物浦對森林嘅敗杖，源於對手用盡球場闊度進行快速反擊，呢個亦係今季車路士嘅殺手鐧。車路士反擊時，今季獨當一面嘅彭馬經常運用速度由自己半場殺到對手門前接應，自己射入或交比進攻拍檔尼高拉斯積遜(Nicolas Jackson)。利物浦嘅防線若果逼得太前，將受極大威脅。

 

史洛透露，國際賽期後部份球員嘅狀態有待確定，暫時只知門將阿里遜(Alisson Becker)因傷缺陣到11月底。車路士嘅防線有古古尼也(Marc Cucurella)同埋韋斯利科芬拿(Wesley Fofana)停賽，防守上有隱憂。兩隊能企喺前四反映實力接近，但利物浦有主場之利，車路士作客晏飛路9場僅贏得1場，主隊可以睇高一線。