今次輪到介紹歐國聯八強另一對世界前十嘅對決。荷蘭、西班牙喺首回合以2:2收場，作客嘅西班牙空有60%控球率與及一早入波嘅優勢，下半場一開波卻已經反輸，直至尾段荷蘭19歲仔左閘哈度直紅打少個，「狂牛」臨完場先至由後備入替嘅阿仙奴中場馬連奴（Mikel Merino，圖左）追平2:2。呢位司職中場嘅球員近期俾冇晒正前鋒嘅阿仙奴推上最前應急，入球數字方面只能講得上係不過不失（七場正賽入四球），勢估唔到首回合成為西班牙救星，亦同時凸顯咗西班牙鋒線創造機會方面仍有待加強（全場15射僅2中，xG 1.4）。

事實上，兩隊喺首回合用人方面都有令人失望之處。從荷蘭U19「跳槽」至西班牙U21嘅般尼茅夫中堅侯辛（Dean Huijsen）榮升大國腳，本來就係話題人物，不過上半場40分鐘入替傷出嘅古巴斯（Pau Cubarsi）後全程俾主隊球迷柴台，侯辛亦喺中場失晒位嘅情況下目送費林邦（Jeremie Frimpong）右翼橫傳雷恩達斯（Tijjani Reijnders）射入2:1嘅入球。荷蘭方面，朗奴高文眼見舒克斯缺態、域賀斯又未趕及復出，毅然起用季初俾馬德里體育會放棄、及後落班巴甲哥連泰斯回復狀態嘅迪比（Memphis Depay）做正選中鋒，但結果未能帶來奇跡。

嚟緊番到西班牙華倫西亞進行次回合，人選相對較為充裕嘅西班牙經過調節應可擁有更多主動權。荷蘭方面，踢慣四後衛嘅佢哋喺哈度停賽後竟已冇正職左閘可用，即食解決方案大概會係安排間中喺利華古遜踢右翼衛嘅費林邦頂住先。