麥巴比嫌今期歐國聯比賽唔夠重要而唔歸隊，呢單花邊已經蓋過晒主隊比利時嘅聲勢。從競技層面計，麥總喺上回合法國主場都係贏到2:0先至落場郁動一下，迪甘斯唔用麥總打比利時大可以話係「早有準備」，問題反而係在於法國《隊報》已經下定論今次係唔尊重球隊，話晒麥總已經係貴為隊長，佢咁樣選擇性出場所帶嚟嘅長遠負面影響真係未必一時三刻就浮現出嚟。

麥總缺席，前鋒位置嘅焦點轉移去到車路士嘅尼干古（Christopher Nkunku）身上。尼干古轉投英超前喺德甲踢到曉飛，但緊隨而嚟嘅傷患令佢不論喺球會以至國家隊都係長期缺席，嚟到今季尼干古喺車仔嘅平均落場時間都未算好多，但11場正賽就已經射入7球，平均用60分鐘就已經整到一粒，計效率就真係冇得頂。而尼干古近一年幾以嚟首次代表國家隊亦都有個好開始，上星期以正選左翼身分上場就為法國射入追平以色列1:1嘅入球。嚟緊有麥總繼續「讓賽」，就睇下尼干古能否把握機會重新上位。