法國雖然已經儲夠分數進入歐國盃四強，佢哋主場對以色列只能賽和0:0點講都係難以接受。麥巴比申請放假，中場不斷試陣兼夾高路梅安尼（Randal Kolo Muani）火力不足大家已有心理準備，呢度係想指出法國條防線其實都危機四伏，當要面對強隊嘅時候，大家似乎都對佢哋冇乜信心。

法國後防隱患反而要由中場老將基士文退出國家隊講起。同麥總唔同，基士文喺國家隊打滾十年，同唔少骨幹球員建立到深厚關係，佢嘅離去或多或少令老友迪奧靴南迪斯（Theo Hernández）失去依靠，再加上哥哥盧卡斯仍然養傷，就令迪奧更為孤單落寞。迪奧靴南迪斯喺AC米蘭打法比較自由，番去國家隊較難施展插前助攻呢瓣，亦令迪奧更為進退失據，面對星級對手時就亦較易見有甩漏。教練迪甘斯今期屈服於阿士東維拉左閘甸尼（Lucas Digne）嘅復蘇而重召入隊，無疑令迪奧再添無形壓力。

迪甘斯同期礙於形勢重召嘅仲有基士文另一friend子、喺國家隊要「屈就」改踢右閘柏華特（Benjamin Pavard），不過觀迪（Jules Koundé）就算上場對以色列表現麻麻亦未必輕易讓出右閘位置，更何況柏華特心儀嘅位置係更難成功爭取嘅中堅，就算佢有五十幾場國際賽經驗，重新入隊都難言可以為法國後防提供即時支援。

法國同對手意大利都已經確定喺A2組出線，意大利亦已經拉開3分距離，今場收官戰本來未至於會預期有好大競爭性，好衰唔衰法國門將邁治蘭（Mike Maignan）之前口出豪言指意大利計落得兩個係夠班入到法國隊，完全唔俾面一班同樣喺意甲搵食嘅同工。意大利教練史巴列堤老實唔客氣，已經用咗呢單嘢嚟激勵一眾球員，到時好似利迪基（Mateo Retegui）呢啲新晉前鋒又如果想爭取表現借強隊省招牌，呢條法國防線就更加難捱咯。