新手球迷未必會為意匈牙利曾經長期係歐洲魚腩，而荷蘭就係近30年保住正賽、友賽9連勝嘅絕對優勢。只不過對上一次贏波都已經係11年前嘅世界盃外圍賽（兩回合共計大炒12:2），係洛賓、雲佩斯帶領荷蘭接連兩屆世界盃拎牌嘅一代，匈牙利隊長蘇保斯拿爾（Dominik Szoboszlai）當時只係剛夠11歲。時間一轉去到上個月，兩隊喺歐國聯首次碰頭，荷蘭作客就只能下半場末段追平1:1，為匈牙利先開紀錄嘅前鋒路蘭沙拉爾（Roland Sallai）表示次回合佢會預期戰情都係咁上下，不過今次荷蘭番到主場，點都會較為主動，反而可以留意到時荷蘭喺中前場有咩調節。

沙維西蒙斯喺今個夏天嘅歐國盃落場時間越嚟越多，腳法較為細膩嘅佢已成為荷蘭世代交替嘅重要一步，今期重傷長唞不論係對RB萊比錫定係荷蘭都係一大損失。荷蘭今次參加歐國聯將沙維西蒙斯從攻中移到去右翼，佢傷出後個位照計會由失勢嘅馬倫（Donyell Malen）補上。馬倫今季連同多蒙特一齊載浮載沉，喺球會嘅落場時間已經唔多，雖然剛剛喺歐聯後備上陣一箭定江山，但剛剛已傳出多蒙特準備喺歇冬期間賣走佢，反觀RB萊比錫則同期傳出會喺一月向PSG正式重金收購沙維西蒙斯呢位重要借將，兩位同喺德甲搵食嘅荷蘭翼鋒可謂同人唔同命。

另一方面，荷蘭呢一場將好大機會迎接缺席14個月嘅巴塞隆拿正中場迪莊（Frenkie de Jong）回歸。迪莊自十月復出以嚟，喺聯賽每場仍未踢多過半場，估計今場亦會只係象徵式落吓場唔會去盡，但長遠計佢同已經全面上位嘅利物浦中場格雲貝治（Ryan Gravenberch）會否存在競爭關係，則可以留意教練朗奴高文呢場以至下一場對波斯尼亞會有咩安排同調動。