利華古遜老細Carro（圖左）前排口不擇言，公開話唔喜歡拜仁慕尼黑體育董事Eberl（圖右）。好快Carro已經縮沙道歉，有趣係Carro鬧Eberl嘅時候，多蒙特老闆Watzke與及RB萊比錫前主席Mintzlaff（現時已管晒成個紅牛體育，例如會管埋紅牛F1）竟然都跳出嚟聲援Carro，令大家不禁懷疑利華古遜——多蒙特——萊比錫係唔係已經組成咗一個「反拜仁聯盟」。

一直以嚟，德甲有力爭冠嘅球隊有邊隊唔係想推倒拜仁？但近年真正嘅成功個案少之又少（喺利華古遜之前，對上一個非拜仁嘅德甲冠軍已經數到去12年前嘅多蒙特）。咁如果係幾隊夾埋諗計呢？當Mintzlaff仍然只係管理萊比錫嘅年代，佢同Watzke已經越行越埋，所發表嘅德甲財務政策意見相似。另一方面，Mintzlaff同利華古遜老細Carro以至終極老總拜耳藥廠主席Werner Wenning都係friend底，去年萊比錫失去Eberl要搵繼任人時，Mintzlaff冇走去利華古遜撬Rolfes過檔可謂俾足面，呢一系列嘅三角關係俾到球迷好多幻想空間。

多蒙特Watzke話就話係德國足壇近年嘅「公職王」，又似乎唔係好方便運用自己影響力左右到德甲發展，慣咗見好價就肯賣人嘅「多仔」亦只係賣到一個點終於要「斬手指」唔再亂咁賣星俾拜仁。咁利華、萊比錫又跟唔跟到機？Mintzlaff首先發難，將拜仁本來放晒風要爭嘅PSG借將沙維西蒙斯（Xavi Simons）多留一季，代表荷蘭剛踢完歐國盃嘅西蒙斯身價呢兩年嚟已經升咗一倍上到8000萬歐羅，萊比錫今次鍊贏拜仁成本唔會低得去邊。

至於利華古遜，今次以至下次嘅夏季轉會窗都應該有啲花生食：拜仁本來已想買莊拿芬達（Jonathan Tah），到伊藤洋輝未出即傷、放走迪歷特後開咧作客禾夫斯堡又幾乎瀨嘢，拜仁喺今個夏窗關閉前只會更加渴求中堅。本來買莊拿芬達係被視為下年拜仁搶穫斯（Florian Wirtz）嘅熱身：今年頭盤傾得大家happy，出年主菜先有望坐得埋再傾，但莊拿芬達呢單deal傳咗咁耐只見利華一直企得好硬，Carro更揚言穫斯冇億五歐羅唔賣。啱啱更爆出巴塞隆拿叉多隻腳入嚟搶莊拿芬達，局面變得越嚟越juicy。

大家處於同一聯賽，關係既係競爭亦可以互惠互利，有時唔係開口話反就可以信得晒。上季利華搶灘成功前車可鑑，加上拜仁重建路程似乎會比預期中再崎嶇啲，列強有得繼續趁佢病攞佢命固然係爽，但筆者應為還需要留意上述呢幾宗球員交易最終發展走向，先有助判斷呢三隊波為咗成功願意真正付出幾多。

 

相關內容:

---