上季賀芬咸幾經波折臨尾神奇地以第7名衝線兼有得踢今季嘅歐霸，但失算在放手俾上位中嘅前鋒比亞離隊，而補充嘅力量又根本補唔到個缺口（荷錫Adam Hlozek從利華古遜過檔至今，聯賽只入到1球），當10戰9分得個第15，兼夾上週同「長留德甲之中表現最削」嘅奧格斯堡賽和0:0，賀芬咸高層終於下定決心同教練馬達拉素說再見。

從來換帥都唔一定包保（即刻）見效，更何況今次嘅新面孔Ilzer來自奧超格拉茲，全無德甲經驗（雖則帶格拉茲4季拎過晒奧超冠亞季軍），賀芬咸今次恐怕又要回到起點重頭上路。暫時預計得到嘅係帶慣4-4-2嘅Ilzer勢將改動馬達拉素用開嘅3-5-2陣式，賀芬咸有機會要補購多一位見得吓人嘅前鋒，暫時重擔就要交俾老而彌堅嘅前鋒卡拉馬歷（Andrej Kramaric）繼續頂住先。卡拉馬歷合約季尾到期，估計賀芬咸都會想挽留佢穩定軍心，與此同時亦要留得住潛質新人，其中德國U20中場比索科（Tom Bischof）已經「無奈地」成為隊中核心，佢嘅表現亦已經引嚟其他球會嘅興趣，賀芬咸實在需要留住呢位同樣係季尾完約嘅新希望。

客隊方面，RB萊比錫近年對賀芬咸踢出4勝1和嘅一面倒優勢，但自11月以嚟萊比錫已經3場不勝（1和2負），隊內氣氛唔係太好，其中高層係較為不滿教練馬高路斯帶唔番本來嗰套高壓+快攻。上星期已經提過RB準備打開夾萬要將沙維西蒙斯正式搶到手，潛台詞就係紅牛足球部自高普入主之後已經定調，要推RB萊比錫衝冠，現時就算排緊喺積分榜第二都係毫無意思，因此嚟緊馬高路斯如果再唔振作，RB個衝冠行程都未必會幫佢預留一個席位。