利華古遜賽前出post影住德甲隻「沙律碟」，佢哋就守得雲開終於可以喺碟上刻上自己嘅名字，但原來今次重點係喺佢哋個名下面，就係今晚嘅對手基爾（Holstein Kiel）。大家有眼得睇，基爾呢個名都已經係百幾年前mark落，而現代德甲正式成立以嚟，基爾係嚟到今季先至首次亮相。

基爾嘅組班本身已係先天不足，尚未開季隊長菲臘辛達就已經俾慕遜加柏撬走，全隊現時就只係靠僅僅做過3場大國腳與及叫做踢過吓熱刺、富咸嘅34歲中場賀治比（Lewis Holtby）回流撐住，開咧後亦「不負眾望」5戰4負，僅有嘅1分就係從另一降班熱門波琴身上取得。以佢哋呢班波嘅規模同預算，恐怕去到歇冬轉會窗都未必入到夠級數嘅援兵救亡。

利華古遜上場作客拜仁意外地先開紀錄，喺週中要踢歐聯迎戰AC米蘭嘅顧慮下賽和1:1應該收晒貨，及後再贏埋AC米蘭就更係喜上加喜，今晚著住百二周年會慶復刻波衫迎戰榜尾球隊理應盡數，但考慮到國際賽檔期後就要面對開局好順嘅老二法蘭克福，盛傳教練沙比阿朗素會利用呢場壓力冇咁大嘅比賽幫成隊波做調節。二號龍馬迪哥華（Matej Kovar）上季已經係「盃賽專家」，就算換龍都可以投以信心一票，但好幾位副選球員例如前鋒舒希克（Patrik Schick，已失去絕對主力位置）、攻中荷夫曼（Jonas Hofmann，上季下半段已經回落）、防中柏拉斯奧斯（Exequiel Palacios，手術後復出）以至後衛比洛施安（Jeanuël Belocian，從雷恩新加盟）、穆基尼（Nordi Mukiele，PSG外借回歸德甲仍未入局）如果一炮過放晒落場做正選，呢隊利華嘅流暢、銳利程度就難免要打個折扣。

 

預計兩隊正選陣容：

【利華古遜】
Kovar - Tapsoba, Tah, Belocian - Tella, Xhaka, Palacios, Grimaldo - Hofmann, Schick, Wirtz

【基爾】
Weiner - T.Becker, Erras, Geschwill - Porath, Holtby, Knudsen, Gigovic, Puchacz - Pichler, Machino