今個禮拜本來係要介紹拜仁對柏林聯，但實在不能無視今期嘅風頭躉多蒙特：聯賽、歐聯、德國盃三場波輸晒（全部客場），德國《踢球者》最新一期封面標題索性形容多蒙特為free fall，副題則係：七日輸三場，嚟緊還要打萊比錫。咁呢次主場要惡鬥RB萊比錫嘅多蒙特，實情係有幾水深火熱呢？

計近況、計對賽，踢主場嘅多蒙特全無優勢可言。除咗上面提及嘅近一星期三連敗，單計今晚嘅對手RB萊比錫嘅話紀錄都係差到冇人有：上季主、客輸晒（總比數3:7）、近7次對賽更係輸足6次。上年主場中堅曉姆斯領紅被認為係場波嘅轉捩點，如今曉姆斯都已經出走羅馬，剩低嘅人選則硬係接唔到棒，本來嘅另一副隊長中堅蘇尼（Niklas Süle）亦已失勢（啱啱進入埋傷兵名單），換來嘅係游走於後衛與防中之間嘅隊長安利簡（Emre Can）做晒箭靶。當安利簡俾人話唔掂、蘇尼又話唔掂、就連上季好掂嘅攻中白蘭特（Julian Brandt）都俾人鬧埋一份（週中德國盃對禾夫斯堡更係離奇地墮後企咗防中位），大家都識得問：唔掂嗰個其實係唔係教練紐尼沙軒至真？

紐尼沙軒份CV本來都係好普通（兩年土超安塔利亞），前任泰錫更係殺到入歐聯決賽先至黯然離去，紐尼沙軒開季至今只得一場歐聯7:1實在唔夠credit捱過谷底。還要考慮埋打完萊比錫之後還有兩場歐聯、兩場德甲，去到月尾就已經係主場對拜仁，都頗為肯定係沙軒仍冇起色嘅話，高層斷唔會留住佢嚟打拜仁。教過利華古遜嘅羅渣舒密特、以至係新鮮豉椒炒魷嘅前曼聯主帥坦夏......一堆候選人名已經開始進佔八卦新聞嘅標題。

沙軒手上嘅牌已經好爛，繼進攻冇咗艾迪耶美之後新近再傷埋後防通天老倌拉亞臣，暫時估計「陳仔」安利簡又需要客串右閘，紐尼沙軒眼前每場比場無疑已係場場考牌場場驚心，就算球員對佢有感情唔想送佢一程，呢個時候硬碰RB亦絕對係惡啃，只能寄望今季主場5場全勝嘅魔力可以維持落去，又或者同樣踢咗週中德國盃比賽嘅RB輪換幅度再大些少冇咁高壓逼搶。

預計兩隊正選陣容：

【多蒙特】
Kobel - Can, Anton, N.Schlotterbeck, Bensebaini - F.Nmecha, Gross - Malen, Brandt, Gittens - Guirassy

【RB萊比錫】
Gulacsi - Geertruida, Orban, Lukeba, Henrichs - Vermeeren, Haidara - Baumgartner, Nusa - Openda, Sesko