近兩季寫慕遜加柏都係冇乜好嘢：球隊冇錢買人、用人佈陣失當，連續三季跌落下半版既好笑但又好合理。慕遜加柏備戰今季看似睇到轉機，不過既然被選中踢新球季揭幕戰硬撼上屆冠軍利華古遜，難免要再一次俾人睇低一線。

慕遜加柏之前有多位重要球員走人都換唔到轉會費，對上季嘅組班確有一定影響，如今球會睇嚟已經搵到條務實嘅出路，就係用相對平嘅價錢購入名氣冇咁高但又擁有領導力嘅球員，於是會見到兩個中場史杜加（Kevin Stöger）（波琴前副隊長）、菲臘辛達（Philipp Sander）（今季升班馬基爾前隊長），以至上年新升班主場射入拜仁慕尼黑兩球嘅海登咸中鋒卡恩迪安斯（Tim Kleindienst）先後加盟。呢三位新兵喺上星期德國盃首圈賽事已經全數落場，慕遜加柏亦一如所料淘汰丙組嘅奧厄。呢場波慕遜加柏獲得唔錯嘅評價，前鋒柏利亞（Alassane Plea）更係取得1個入球1個助攻，不過對手實力始終有差距，加上多年嚟嘅主力防中干尼（Manu Koné）攤牌想即走，慕遜加柏嚟緊防中位以至其後嘅中堅位都仍會有啲變數。

利華古遜後防配置方面亦都未係定得晒，不過上星期踢德超盃決賽總算有驚無險，喺大半場打少個之下延續上季魔法88分鐘追平，最終靠互射十二碼力壓勁敵史特加執多個盃仔。呢場比賽比數相對事小，較為重要係睇到利華古遜大致keep得番上季喺國內食糊嘅韌勁（踢到75分鐘左右先至換入進攻主力落場屈機）同運氣，賽前對球員狀態嘅擔心亦應可以暫時放下。利華古遜喺德超盃有新兵泰利亞（Martin Terrier）直紅與及前鋒邦尼菲斯（Victor Boniface）賽後俾賽會秋後算賬，二人同被罰停賽但只會喺德國盃執行，對於佢哋備戰德甲揭幕戰並無影響。

 

預計兩隊正選陣容：

【慕遜加柏】
Omlin - Scally, Itakura, Elvedi, Netz - Weigl, Reitz - Honorat, Stöger, Plea - Kleindienst

【利華古遜】
Hradecky - Tapsoba, Tah, Hincapie - Frimpong, Xhaka, Andrich, Grimaldo - Hofmann, Boniface, Wirtz

相關內容:

---