08/02/2025 多蒙特 vs 史特加

足球資訊 | 德國甲組足球聯賽(2024/25) | 發布日期: 08/02/2025

比賽日期	主隊	客隊	主勝機率	和局機率	客勝機率
2025-02-08 22:30	多蒙特	史特加	55.4 %	18.4 %	26.2 %

主勝機率	和局機率	客勝機率
55.4%	18.4%	26.2%

排名: 德甲(11) vs 德甲(5)

直播資訊: Now 638, NowE, beIN Sports

承接上星期講開嘅多蒙特故事：看守教練Tullberg星期六穩穩陣陣過埋海登咸（2:1）功成身退，星期日尼高高華（Niko Kovac）就正式上任。有傳多蒙特本來係想搵人頂半季再算，但尼高高華表明冇興趣做temp，已經連續兩次委託少帥都失敗告終嘅多蒙特陷於被動，只好「就範」。

而就喺尼高高華上班、冬窗關閉之後，負責砌陣容嘅技術總監Mislintat就隨即收大信封。喺Mislintat任期嘅最後一個轉會窗中，預計較有效果嘅嘅交易就只係分別借用瑞典左閘Daniel Svensson同埋問車路士借用已有啲名氣嘅英格蘭青年軍中場卓古美卡（Carney Chukwuemeka，圖左），單睇人數、位置、名氣，呢系列嘅轉會操作對於一隊仍要衝擊歐聯十六強嘅隊伍嚟講都唔算合格，但考慮到冬窗開開吓紐尼沙軒先至被炒，喺下任教練人選未明嘅情況下早已預咗轉會係難搞，就例如多蒙特本已㩒定二千幾萬歐羅從法甲里昂購入法國U23攻中卓基（Rayan Cherki），最終亦因里昂主席反口唔賣而告吹。

與此同時，出售翼鋒基化史基尼亞（Khvicha Kvaratskhelia）俾PSG嘅拿玻里尋找代替品，搵到嚟多特門前，佢哋睇中咗季初爆發嘅艾迪耶美（Karim Adeyemi）。雖然艾迪耶美拒絕咗拿玻里，但同時亦流出咗兩個重要訊息：艾迪耶美只係唔想季中轉隊、艾迪耶美其實更加心儀英超。尼高高華接手嘅，就係一隊咁樣七零八落嘅多蒙特。

嚟到首仗迎戰排名高六位嘅史特加，尼高高華嘅可用人選制肘唔細。「多仔」將馬倫賣埋俾維拉之後，中前場嘅人選組合變化已經唔多，加上負責連繫三線嘅中場菲歷斯尼美查繼續倦勤、中堅舒洛達碧克繼續坐波監，另一正職中堅蘇尼亦只係恢復訓練之中狀態未明，有得留任隊長嘅安利簡（Emre Can）好大機會留守中堅位置。以上嘅限制同多特上一場對海登咸差唔多，而嚟緊對手史特加始終比海登咸高一班，加上近年多蒙特對戰史特加嘅成績極曳，聯賽四連敗之餘，今季首回合作客更要輸到1:5，就算出名主守嘅高華想先求穩守，以現時人腳組合要守到史特加都需要各方一齊努力配合先掂。

客隊史特加喺冬窗亦算忍手，不過佢哋已經歐聯出局，應付德甲、德國盃兩線應已夠用。史特加經歷聯賽、歐聯三連敗後，星期四喺德國盃八強淘汰另一甲組代表奧格斯堡，比賽期間受傷退下火線嘅攻中米諾特（Enzo Millot）賽後檢查證實冇大礙，同樣因病錯過呢場德國盃八強嘅前鋒禾達美迪（Nick Woltemade）、右閘華格路文（Josha Vagnoman）亦好大機會趕及復出待命。加上「大鼻子」防中安祖路史迪拿（Angelo Stiller，圖右）獲提前續約榮登全隊收入最高球員，成隊波嘅人腳、軍心都處於近期較佳水平。

預計兩隊正選陣容：

【多蒙特】
Kobel - Ryerson, Can, Anton, Bensebaini - Sabitzer, Gross - Beier, Brandt, Gittens - Guirassy

【史特加】
Nübel - Stergiou, Hendriks, Chabot, Mittelstädt - Karazor, Stiller - Leweling, Undav, Führich - Demirovic

分類:

足球資訊

08/02/2025 多蒙特 vs 史特加

分類:

標籤:

關於我們:

快速連結:

聯絡我們: