緬恩斯悶聲發大財，單係古達賣俾白禮頓一單deal就已經3000萬歐羅落袋，呢個價莫講係德甲中游，就算係整個德甲嚟講都算得上係天文數字。之但係呢3000萬歐羅暫時都係未有乜嘢大作為，喺週中公佈嘅所謂「今季最大宗收購」亦只係從比甲真特以低於市價400萬歐羅買入韓國攻中洪賢錫（圖左），如無意外週末聯賽都未會見到佢落場。

緬恩斯喺未有重磅收購到手之下，就算有利華古遜超平價甩賣嘅中場阿美利（Nadiem Amiri）立即上力兼先開紀錄，聯賽首場亦只能與不被看好嘅柏林聯踢成1:1平手，球隊不論攻防都係未夠穩定，後備陣容亦有待補強，星期六作客面對近8次對賽2和6負嘅對手史特加，單計往績就已經係輸晒。

上季亞軍史特加面對一班功臣離隊，雖然已經盡力將破壞減到最低，新買入前鋒迪米諾域（Ermedin Demirovic）亦不負眾望首場對弗賴堡閃電入波，無奈係季前熱身進度比預期中再差些少，首場賽事所見狀態仍未完全回復，空有控球優勢之下未能再做具威脅攻勢，最終只能俾主隊反勝3:1。史特加週中稍作輪換，用一場德國盃嘅大勝幫全隊提升番士氣，此外由新任隊長艾特簡卡拉沙（Atakan Karazor）與及新入選德國隊嘅安祖路史迪拿（Angelo Stiller，圖右）組成嘅雙防中防線逐漸成形，預計番到德甲主場將可以更佳面目示人。

 

預計兩隊正選陣容：

【史特加】
Nübel - Stenzel, Chase, Chabot, Mittelstädt - Karazor, Stiller - Millot, Führich - Undav - Demirovic

【緬恩斯】
Zentner - Kohr, Leitsch, Hanche-Olsen - Caci, Sano, Amiri, Mwene - Onisiwo, J.S.Lee - Burkardt