慕遜加柏、史特加兩隊對賽主場優勢明顯，近5場德甲對碰都係主隊贏波。今場主隊慕遜加柏開季已有3分落袋，面對出閘脫腳只得1分嘅史特加，定必想延續走勢盡取三分。

史特加礙於後防歇暑期間失血過多，開咧頭兩場都係一度領先之下最終反輸、被追平，尤係上場主場面對失去主力嘅緬恩斯都未能全取三分，後防線備受壓力。史特加已喺開咧後從跌落英冠嘅般尼購入中堅艾達希爾（Ameen Al-Dakhil），外界對呢位22歲中堅抱一定期望，但此子都只係進入獨自訓練階段，今晚以至星期二晚歐聯硬撼皇家馬德里嘅比賽都已sure未ready。史特加後防更為頭痛嘅位係右路，開季以來擺位、人選換來換去都未算滿意，開季時狀態未夠嘅華格路文（Josha Vagnoman）睇嚟今場都要輪到試佢踢正選。

慕遜加柏大亂兩季過後睇嚟見到曙光，首場作客利華古遜雖敗不辱，上一場作客波琴亦都把握到級數差距全取三分，嚟緊面對攻強於守嘅史特加，首兩場聯賽已有2入球1助攻嘅前鋒基蘭迪安斯（Tim Kleindienst）預料將可以對史特加嘅後防構成威脅。

之前都介紹過，慕遜加柏用較平洗費換入多位有領導才能嘅球員，而佢哋都屬於中、前場球員，後防方面就冇乜著墨。但好在慕遜加柏成功喺轉會窗關閉前賣甩防中干尼，慳落嚟嘅錢確保到唔需要再賣埋主力後衛板倉滉，總算keep得住一條見得人嘅正選後防線。所以對於慕遜加柏後防嚟講，今場亦係確定人選後嘅一次重要檢閱。

 

預計兩隊正選陣容：

【慕遜加柏】
Omlin - Scally, Itakura, Elvedi, Netz - Weigl, Sander - Honorat, Plea, Stöger - Kleindienst

【史特加】
Nübel - Vagnoman, Chase, Chabot, Mittelstädt - Karazor, Stiller - Rieder, Führich - Undav - Demirovic

相關內容:

---