2025年3月21日，杜曹喺倫敦溫布萊球場迎嚟執教英格蘭國家隊嘅首場比賽。呢場波作為世界盃歐洲區外圍賽首仗，主場2:0贏世界排名只係第65嘅阿爾巴尼亞可以話係預期之內，而大家更在意係呢位英格蘭破天荒引入嘅德籍教練可以為「三獅軍團」帶嚟啲乜嘢新氣象。

一如所料嘅係，英格蘭一開波就迅速掌推咗比賽節奏，但外界原本期待嘅流暢進攻喺初面對阿爾巴尼亞時又未至於好明顯。首次代表英格蘭大國腳上陣嘅阿仙奴18歲左閘路易斯史基利（Myles Lewis-Skelly）開賽20分鐘即先開紀錄，固然係杜曹嘅神來之筆。而喺傷情嚴重嘅中堅位置，杜曹起用阿士東維拉嘅干沙（Ezri Konsa）與及代表紐卡素新近贏出聯賽盃決賽嘅般恩（Dan Burn）取得不俗效果都係一次得著。此外夠膽起用闊別國際賽一整年、外借維拉得以翻身嘅華舒福（Marcus Rashford）搶當正選左翼，都睇得出杜曹埋位前已經跟貼英超形勢做晒功課。

咁當然，杜曹手上仍有唔少前教練修夫基留低嘅重要資產，正例如助攻第一球以至射入2:0嘅人選（比寧咸Jude Bellingham、哈利卡尼Harry Kane）都係源自修夫基時期留低嘅骨幹。至於修夫基年代未能解決嘅問題，例如已經明顯減產嘅翼鋒科頓（Phil Foden），以至佢嘅曼城前隊友、年屆34嘅基爾獲加（Kyle Walker）兩位都仍要首發上陣，可見有啲位置杜曹暫時未有更好嘅方案，而大家係預期佢將會搵到個令人滿意嘅解答。

整體而言，杜曹面對期望甚殷嘅廣大英迷，上任首仗對著阿爾巴尼亞無疑係一個企穩陣腳嘅利好時機。嚟緊星期二晚英格蘭繼續喺主場迎戰世界排名140嘅拉脫維亞，如無意外英格蘭嘅後防仍未會受到真正考驗，我哋又即管睇吓杜曹喺仍多沙石嘅進攻方面會否作出其他嘗試。（英格蘭隊X圖片）