今季英格蘭第一個錦標將於星期日出爐，2023年失意決賽嘅紐卡素，迎戰上屆盟主利物浦。紐卡素周一喺聯賽1:0作客贏修咸頓，對手利物浦就喺星期二同巴黎聖日耳門激戰120分鐘，互射十二碼後結束歐聯之路。論體力同精神面貌，似乎紐卡素會佔優，不過盃賽係一場過，充滿可能性，當中兩個可能性：史洛喺英格蘭捧走首個獎盃，亦可能係紐卡素喺70年後再贏本土盃賽。

 

兩隊喺二月底聯賽對碰，喺伊薩(Alexander Isak)缺陣下，利物浦主場贏2:0，呢場亦係紐卡素連續第17次對利物浦未能打開勝局。除咗數據上令人擔心，左翼哥頓(Anthony Gordon)對白禮頓時魯莽領紅被逐，呢場需要停賽。頂上嘅哈菲班尼斯(Harvey Barnes)對韋斯咸助攻比基馬尼斯(Bruno Guimarães)射入致勝一球，但速度同個人突破能力都比唔上哥頓。中鋒伊薩仍然係鋒線上最危險嘅人物，近5場對利物浦入咗4球。呢兩位加積及梅菲(Jacob Murphy)如果能夠踢出PSG鋒線嘅水準，傷疲盡出嘅利物浦未必能夠應付。事實上，聯賽首循環主場賽和3:3，紐卡素嘅中場基馬尼斯，東拿利 (Sandro Tonali)同祖亞寧頓(Joelinton)體力化同速率兼備，令利物浦吃盡苦頭。

 

利物浦係聯賽盃冠軍紀錄保持者(10次)，上季決賽喺主力受傷，大量年青球員上陣下，由雲迪克(Virgil van Dijk)加時頭槌頂入捧走聯賽盃。星期二嘅歐聯大戰，阿諾(Trent Alexander-Arnold)受傷，呢場將會缺陣，而另外兩個右閘干拿巴特利(Conor Bradley)同祖高美斯(Joe Gomez)都係養傷中，剛入選英格蘭大軍嘅中堅昆沙(Jarell Quansah)將再客串右閘，再加上干拿迪(Ibrahima Konaté)亦未肯定能出戰，利物浦後防存在隱憂。幸好前線加保(Cody Gakpo)上場復出後備上陣，加上穩定嘅沙拿(Mohamed Salah)，面對防守較弱紐卡素，仍有一定嘅優勢。

 

兩星期前嘅足總盃賽事被白禮頓淘汰，紐卡素今季嘅唯一獎牌希望就係聯賽盃。基馬尼斯賽前就戰意十足，認為呢場係佢地嘅世界盃決賽，而利物浦如果能夠從中歐聯敗仗中恢復，以球員豐富決賽經驗，仍然係較被睇好嘅一隊。