社區盾作為英超揭幕戰，雖然都係一個錦標，但呢個盃就唔係個個球迷都想要，事關傳說中有贏盾無冠(英超)呢個魔咒，所以坊間又稱社區盾為「邪盾」，而上屆社區盾嘅得主就正係聯賽第二嘅阿仙奴。今屆社區盾戲碼同上季最後一場賽事足總盃一樣都係曼市打吡，兩隊又再正面交鋒，未知坦夏係咪能夠再威多次，但未開季已經諸事不順。

 

上季季尾一片批評聲音下，球季最後一場賽事贏宿敵捧盃，坦夏最後得到球會續命(約)，以為嚟緊會有個好嘅開始，點知季前熱身賽成績欠佳，先後輸俾阿仙奴同利物浦，仲要係未開季已經傷兵滿營。以五千二百萬鎊從皇馬手上搶下嘅十八歲法國中堅約羅(Leny Yoro)，處子登場對格拉斯哥流浪表現搶鏡，其後對阿仙奴時蹠骨骨折，手術完成要養傷到11月。麥佳亞(Harry Maguire)同連迪洛夫(Victor Lindelöf)上陣成疑。華舒福(Marcus Rashford)對貝迪斯時傷出，海倫(Rasmus Højlund)拉傷大腿要休戰六星期，新簽嘅荷蘭射手約舒亞舒克斯(Joshua Zirkzee)剛來報到未熟習球隊踢法，對利物浦時坦夏只能用辛祖(Jadon Sancho)踢偽九。坦夏認為辛祖能勝任鋒線上任何位置，喺兵源缺乏情況下，辛祖大有機會正選上陣。

 

對手曼城，友賽車路士用上唔少年輕球員，上季季尾稍為失色嘅夏蘭特(Erling Haaland)重拾射手本色連中三元以4:2擊敗車路士。悠長假期後，夏蘭特明顯叉足電，充滿活力。曼城有大量歐洲盃同美洲盃國腳，都只係今個星期先開操，未必趕及星期六上陣，但年輕球員喺熱身賽時已進入比賽狀態。其中熱身賽場場正選嘅右翼小將波普(Oscar Bobb)以2個入球3個助攻，成為曼城季前最搶鏡嘅新星。嚟緊社區盾佢將會接受重要考驗，代替即將離隊去馬體會艾華利斯(Julián Álvarez)。

相關內容:

---