社區盾作為英超序幕戰，既係一場重要嘅季前熱身賽，亦係一個獎項，阿仙奴同曼城都唔會放軟手腳。阿仙奴上季將聯賽冠軍拱手相讓比曼城，轉會窗一開，就表現出佢哋嘅野心。曼城就有兩位三冠功臣離隊，繼續重點補強。哥迪奧拿 (Pep Guardiola) 認為呢場對手會有優勢，因為阿仙奴上季季尾賽程冇咁頻密，又早佢哋兩星期開操，佢亦承認球隊每季都係遲入局。睇返對上兩季社區盾，曼城先後輸比李斯特城同利物浦。不過，失落個盾又未必係壞事，唔少球迷都認為社區盾係「不祥物」- 由2011/12開始嘅12個球季中，只得2018/19嘅曼城能夠成功擺脫「贏盾失冠」嘅魔咒。

 

曼城上季季尾狀態火熱嘅根度簡 (İlkay Gündoğan) 同馬列斯 (Riyad Mahrez) 今夏相繼離隊，高華錫 (Mateo Kovačić) 同佢嘅克羅地亞國家隊隊友中堅加華度爾 (Joško Gvardiol) 加盟。喺日韓熱身賽之旅，曼城首場先以5:3反勝橫濱水手，夏蘭特 (Erling Haaland) 射入2球並當選最佳球員。第二場贏拜仁2:1，最後一場對馬體會喺雷雨之下進行，完場前魯賓戴亞斯 (Rúben Diaz) 入波，最後仍輸1:2。迪布尼 (Kevin De Bruyne) 歐聯決賽時受傷，雖然已經復操，但季前賽未有上陣。佢可算是阿仙奴殺手，最近八場對阿仙奴有6個入球2個助攻。剛同曼城續約，上季足總杯入球淘汰阿仙奴嘅中堅尼頓艾基 (Nathan Aké) 剛傷癒，上場被列作後備，預計可以復出。至於全英後衛身價第二高嘅加華度爾，就未趕及喺限期前完成轉會手續，球迷要睇佢嘅風采，需要等多一個星期了。

 

阿廸達 (Mikel Arteta) 承認上季有所不足，夏季大肆增兵，先後引入廸勤懐斯 (Declan Rice)，夏維斯 (Kai Havertz) 同添巴 (Jurrien Timber)，仲斟緊賓福特嘅門將拉耶 (David Raya)。熱身賽踢六場雖然只係贏得三場(美職明星隊，巴塞羅那，摩納哥) 但當中見到個別球員已經上力，最搶鏡嘅可算係上季加盟後未取得正選嘅杜沙特 (Leandro Trossard)，佢以3個入球，成為球隊「季前熱身賽神射手」。捷西斯 (Gabriel Jesus) 因為膝部小手術而要養傷幾個星期，杜沙特會係偽九號一個嘅唔錯選擇。而新簽夏維斯，雖然喺美職明星隊窩利挑戰賽，創下14射0中嘅尷尬記錄，一度被受批評，之後嘅熱身賽都有2個入球。另一攻擊球員沙卡 (Bukayo Saka)，對摩納哥時因為身體抱恙而缺陣，已經復操並隨時候命。

相關內容:

---