曼聯同紐卡素，上個盃賽決戰，係1999 年嘅足總盃決賽，呢場亦係紐卡素最近期嘅主要盃賽決賽，當時輸0:2。可能溫布萊並唔係紐卡素嘅福地，佢哋近8場喺溫布萊踢嘅賽事都全敗，上個勝仗已經係咸豐年代(1954年)嘅事。今季佢哋聯賽表現突出，本來大有機會贏一個從未贏過嘅錦標，但呢場可能要用到三號門將，前利物浦球員Karius，大大影響咗Howe嘅部署。

 

紐卡素喺聯賽盃嘅晉級路途，唔算太困難：燦美爾，般尼茅夫，水晶宮，李斯特城同兩回合以3:1贏修咸頓。但最近球隊就狀態下滑，連續4場聯賽都冇贏過。屋漏兼逢夜雨，英格蘭國家隊門神Pope 星期六聯賽對利物浦，為阻止Salah單刀，衝出禁區外用手接波領紅，二號門將Dubravka季初曾經以借將身份為曼聯踢過聯賽盃，所以決賽唔能夠上陣，呢場好大機會係由Karius披甲。Karius喺2018年歐聯決賽失誤後，利物浦引入Alisson，佢從此被打入冷宮，去年夏天約滿，以自由身加盟紐卡素。呢場好可能係佢自2021年2月，為柏林聯上陣對史浩克04之後，第一場正式賽事。雖然狀態成疑，但佢數據上其實唔錯，喺利物浦時嘅不失球率比Alisson仲要高，傳球成功率亦比現時隊友Pope優勝。本來只係半季嘅合約，一月時延長到季尾，Howe亦都話，Karius喺球隊訓練時表現唔錯，而且一路有進步，認為佢已經準備就緒。

 

雖然冇咗門神，但紐卡素嘅中場Bruno Guimaraes停賽三場之後趕及復出。佢停賽期間，紐卡素只能2和1負，今季英超佢缺席嘅6場賽事，紐卡素都未能取得勝利。佢有能力控制球賽節奏，亦能為隊友交出重要傳送，冇佢嘅呢幾場，球隊失去進攻時嘅流暢性，入球數字亦少咗。Guimaraes以及同樣完成三場停賽，佢嘅國家隊隊友Casemiro，將會上演中場爭奪戰。

 

曼聯嘅晉級路途，牌面上係易啲(維拉，般尼，查爾頓)，最後兩回合壓倒性贏諾定咸森林5:0。佢哋自2017之後，都冇再贏過主要盃賽。今季相隔15年再次擊敗巴塞隆拿後，Ten Hag揚言，佢哋有能力擊敗任何球隊。

 

腳風大順嘅Rashford，今季喺聯賽盃踢5場，入5球又有2個助攻。除咗Rashford，曼聯嘅後備席亦有球員能改變戰局，週中對巴塞隆拿嘅歐霸淘汰賽附加賽次回合，曼聯先輸一球十二碼，下半場控制番戰局，由Fred扳平，對手難以應付後備入替Antony嘅速度同活力，憑藉佢一個窩利射入成2:1，兩回合以4:3淘汰巴塞。Ten Hag喺對巴塞前，俾人影到同費爵爺食飯，聯賽同各項盃賽已經進入大直路，曼聯成績咁好，應該會得到費爵爺嘅支持同肯定。

 

聯賽盃決賽，可能係Ten Hag或Howe嘅dream final。雙方球迷期待嘅，將會係 "Heroes, fairytales and glory"，球隊能捧盃而回。

相關內容:

---