隨著英超落幕，球迷焦點就落喺球季最後一項賽事「英格蘭足總盃」。今季同上季一樣，亦係曼市打吡。上季曼聯1:2輸俾宿敵，未能阻止佢哋成為三冠王。曼城今季雖然未能衛冕三冠，但剛破咗英超四連霸嘅紀錄，亦希望繼曼聯同阿仙奴之後，第三次成為聯賽盃賽雙料冠軍。聯賽最終排名第八嘅曼聯，剛創下球會英超史上最低排名紀錄，賽前有傳曼聯新金主打算足總盃決賽後將坦夏落鑊。歐洲大舞台對傳統強隊嚟講，除咗係身份象徵，亦係收入來源。曼聯當然希望藉足總盃冠軍取得來季歐霸一席，否則球隊要脫歐(洲賽)一季，坦夏份工都好難保得住。

 

曼城贏聯賽冠軍之後，球員通宵開party慶祝。哥迪奧拿話冇忘記仲有未完成嘅任務，佢哋已經做好功課，研究對手踢法，球員操練時亦好集中，為大賽作好準備。曼城曾經喺2019同2023捧走足總盃，呢個盃賽喺英格蘭球壇地位崇高，哥迪奧拿認為贏足總盃，係佢領隊生涯中，其中兩場最難忘嘅賽事。

 

儘管上場入球機器夏蘭特(Erling Haaland)未有進帳，曼城仍然有今季狀態大勇，剛剛被選為今季英超最佳球員嘅科頓(Phil Foden)負責攻堅並取得2個入球。今場除咗正選龍門艾達臣(Ederson)要養傷外，曼城將可以full team上陣。後備門將奧迪加(Stefan Ortega)本來已經係專責盃賽，每次落場都有水準演出。聯賽對熱刺時後備入替臨危受命，救出可能係全季最關鍵嘅一球孫興慜單刀，為球隊保住重要三分。

 

曼聯準決賽喺領先3球嘅情況之下，被高雲地利城追和，靠互射十二碼贏波，球隊表現差劣被受批評。到球季就收咧，終於有傷兵復出，包括多次喺溫布萊踢決賽未嘗一勝嘅中場曼治(Mason Mount)。中堅連迪諾夫(Victor Lindelöf)同前鋒馬斯亞(Anthony Martial)已經復操，而華拉尼(Raphaël Varane)同利辛道馬天尼斯 (Lisandro Martínez)上場已經後備上陣，今場有望正選。近兩場曼聯沿用般奴費南迪斯(Bruno Fernandes)同麥湯文尼(Scott McTominay)兩個攻中，配合阿密迪亞路(Amad Diallo)，加拿曹(Alejandro Garnacho)踢4-2-2-2，般奴費南迪斯連續兩季成為英超製造機會最多嘅球員。坦夏將海倫(Rasmus Højlund)同華舒福(Marcus Rashford)列作後備，連贏兩場，對曼城預計會沿用同一陣式。

相關內容:

---