英格蘭足總盃第三圈賽事戲碼，足總盃之皇：阿仙奴(14次)惡鬥應屆盟主曼聯(13次)。2020年阿迪達喺疫情閉門作賽下贏車路士捧走足總盃，當年坐喺後備席嘅蕯卡(Bukayo Saka)亦只有18歲。幾季過去，阿迪達仲等緊第二隻盃，正如曼聯名宿艾夫拿(Patrice Evra)所講，睇阿仙奴就好似睇Netflix劇集咁，總係要等下一季。捧走足總盃之後嘅四季，阿仙奴都係過唔倒第四圈。阿迪達當然對足總盃寄予厚望，而對手曼聯阿摩廉，如果能夠首季就有盃捧，管理層同球迷將會對佢投以信任一票。

 

曼聯上季喺坦夏帶領下，戲劇性地擊敗宿敵曼城捧走足總盃，坦夏亦藉此得到球會續約。馬後炮講呢個決定未必正確，但曼聯呢幾季表現不穩，對弱旅輸波，但面對強隊，球員落場都戰意滿滿，呢種正係「盃賽球隊」，到重要時刻有超水準表現，踢幾場好波就有盃落袋並唔困難。今季聯賽贏曼城和利物浦，就係曼聯嘅代表作。雖然十二月初聯賽作客0:2不敵阿仙奴，上星期對利物浦，球員落場勤力壓逼到利物浦失晒分寸最後打和令球隊士氣大振。呢場阿摩廉話唔會特別去輪換，但曾經喺聯賽盃上陣嘅後備門將比恩迪亞(Altay Bayindir)將會得到正選機會。

 

阿仙奴喺周中聯賽盃四強首回合，0:2不敵狀態top fit 嘅紐卡素。賽後記者提及聯賽盃個波嘅問題，阿迪達回應聯賽盃同聯賽用嘅波抓地力唔同，就比傳媒煲到佢以此作為輸波藉口。皮球似乎冇影響對手紐卡素，而阿仙奴進攻上冇蕯卡確實係少咗個瓣數，當死球一招失效，夏維斯(Kai Havertz)繼續失機頻頻，又一次顯示球隊欠缺一位鋒線劊子手。賽前阿迪達就話曼聯喺對戰利物浦時改變踢法，包括兩邊側擊同後場組織，已經同一個月前對阿仙奴時有啲唔同，所以預期會面對新嘅挑戰。