16/04/2025 阿士東維拉 vs 巴黎聖日耳門

足球資訊 | 歐洲聯賽冠軍盃(2024/25) | 發布日期: 15/04/2025

比賽日期	主隊	客隊	主勝機率	和局機率	客勝機率
2025-04-16 03:00	阿士東維拉	巴黎聖日耳門	13.4 %	16.1 %	70.5 %

主勝機率	和局機率	客勝機率
13.4%	16.1%	70.5%

排名: 英超(7)vs 法甲(1)

歐聯八強次回合，維拉將主場大戰巴黎聖日耳門(PSG)爭入四強。首回合維拉作客1:3落敗，今仗要靠維拉公園球場嘅氣勢嘗試逆轉劣勢。維拉近期狀態回勇，聯賽連贏四場，星期六喺小輪換下大勝篤定降班嘅修咸頓3:0。對手PSG賽前就有一個星期休息備戰歐聯，以逸待勞，儲足氣力同對手一併。PSG今季歐聯已經喺聯賽同十六強階段擊敗曼城同利物浦，維拉會否成為第三隊被PSG粉碎歐聯之夢嘅英超球隊？

首回合維拉作客有個好開始，麥堅(John McGinn)勤力搶走左閘紐奴文迪斯(Nuno Mendes)嘅腳下球快速反擊，由摩根羅渣士(Morgan Rogers)射入領先，到場打氣嘅維拉迷威廉王子激動慶祝。不過PSG行軍速度迅速，再加上球員質素較高，維拉最後都頂唔住對手嘅壓逼，先由到杜爾(Désiré Doué)禁區外射入世界波，再由格魯吉亞球王基化史基尼(Khvicha Kvaratskhelia)推過對手迪沙斯(Axel Disasi)窄位中內柱射入。補時階段紐奴文迪斯接應丹比利(Ousmane Dembélé)嘅直線射入反勝3:1。

維拉板凳夠晒深度，星期六對修咸頓由華舒福(Marcus Rashford)擔任箭頭，艾馬利下半場撳掣換入奧利屈堅斯(Ollie Watkins)，馬倫(Donyell Malen)同麥堅，最後憑三個後備嘅入波奠定勝局。呢場奧利屈堅斯表現出色，有機會代替華舒福踢正箭頭，而射失兩球十二碼嘅阿辛斯奧(Marco Asensio)預計會失去正選位置。

PSG今仗有中堅馬昆奴斯(Marquinhos)停賽復出，令安歷基呢場齊腳，球隊將會繼續以高強度壓迫踢法進擊維拉。首回合射入世界波，19歲嘅小將杜爾狀態大勇連續四場有入球。PSG今季歐聯有四個球員已經有五個以上入球: 丹比利(9), 夏基美(6), 巴高拿(6), 同杜爾(5)。亦有三個球員有四球進帳，而中場祖奧尼維斯 (João Neves)更加係歐聯高強度壓迫之王，今季42次攔截，破咗歐聯七季嘅紀錄。

維拉主場氣勢不容忽視，近17場所有賽事不敗，近4場主場全勝。艾馬利亦善踢歐戰，近13場歐洲賽贏11場。然而PSG球員質素較佳，下半季基化史基尼亞加盟後，攻力提升到另一層次，全場壓迫令對手難以招架，近30場賽事只係輸咗一場，球員信心同狀態到季尾進入頂峰，維拉首回合嘅兩球差距，將會係晉級嘅關鍵。

預計兩隊正選陣容：

阿士東維拉

Martínez - Cash, Konsa, Mings, Digne - Kamara, Tielemans - Rogers, McGinn, Rashford - Watkins

巴黎聖日耳門

Donnarumma - Hakimi, Marquinhos, Pacho, Nuno Mendes - João Neves, Vitinha, Fabián Ruiz - Doué, Dembélé, Kvaratskhelia

分類:

足球資訊

16/04/2025 阿士東維拉 vs 巴黎聖日耳門

分類:

標籤:

關於我們:

快速連結:

聯絡我們: