講開巴塞對拜仁，唔少人都會即刻諗起2020年歐聯閉門作賽嗰場2:8，還有隨後連續兩屆分組賽，巴塞隆拿兩場主場都俾拜仁慕尼黑贏夠3:0。唔覺唔覺，巴塞近十年已經連續輸咗6次俾拜仁。兩年過後巴塞再擺下擂台，球隊上下都極希望贏番一場、贏番面子同尊嚴。

拜仁作客雙殺巴塞嘅年代係由拿高士文領軍，當時費歷克已經帶住最多嘅榮耀離開拜仁重返德國隊，只係勢估唔到德國隊喺卡塔爾世界盃大出洋相，費歷克從神檯秒跌落地獄，直至今季開鑼先至搵得到巴塞呢個好碼頭重返人間。巴塞俾費歷克執番好紀律後把握開季相對輕鬆嘅賽程10場贏盡9場。兩位拜仁舊人費歷克與及前鋒利雲度夫斯基（Robert Lewandowski）相信都躍躍欲試，希望借舊東家幫自己省靚多次招牌。

客隊拜仁就較為濕滯，雖然德甲keep到不敗與RB萊比錫並列榜首，但繼中場靈魂梅斯亞拉繼續養傷之後，上週末聯賽再折損埋防中新星柏夫洛域，板凳深度相比起新近失去龍門達史迪根、翼鋒費蘭托利斯嘅巴塞就更為淺薄。拜仁作客力保不失嘅希望將會交託喺上週末對史特加上演帽子戲法嘅哈利卡尼（Harry Kane），拜仁新舊兩代中鋒嘅對決相信係呢場波嘅最大看點。

 

預計兩隊正選陣容：
【巴塞隆拿】
Inaki Pena - Koundé, Cubarsi, Inigo Martinez, Balde - Casado, Pedri - Lamine Yamal, Raphinha, Ferran Torres - Lewandowski

【拜仁慕尼黑】
Neuer - Guerreiro, Upamecano, Kim, Davies - Kimmich, Joao Palhinha - Olise, Müller, Gnabry - Kane