有費歷克新上任嘅巴塞隆拿係威係勢，日前喺美國友賽贏咗有出新簽嘅安迪歷（Endrick）但未有麥巴比（Kylian Mbappé）嘅皇家馬德里。友賽雙方都未出盡主力係意料中事，而巴塞方面亦似係未滿足於現時手上嘅人腳，歐國盃期間就傳出畢爾包左翼歷高威廉斯（Nico Williams）係咁俾巴塞纏繞，聽落都幾美好，直接將Nico帶過嚟繼續同耶馬（Lamine Yamal）複製西班牙兩翼齊飛踢法乾手淨腳，最新發展卻係費歷克現已將西班牙另一上位攻中奧姆（Dani Olmo）視為首要收購對象，小道消息係雙方情投意合，只爭在巴塞要開個好價俾RB萊比錫考慮。

先唔好諗費歷克嚟緊點樣安置同樣識打10號位嘅奧姆、根度簡（İlkay Gündoğan）、加維（Gavi）等好手（又或者奧姆好似喺RB咁主打左翼？），單講費歷克將要點樣帶巴塞已係一大課題。巴塞前任主帥沙維被指日常訓練programme較為hea，費歷克睇嚟就係要對症下藥，講到明要加強訓練強度之餘亦都要多加訓練球員嘅主動性與及決斷力。

沙維另一為人詬病嘅地方就係太過cool，一季數埋都只係會同啲主力私下詳談兩三次，費歷克今次「一路向西」實行落足鞋油，拉埋助教索治請番當初教門將達史迪根（Marc-André ter Stegen）西班牙文嗰位老師上堂，依家對住球員做briefing已經可以用西班牙文做開場白，講到咁上下先轉番用英文繼續。

費歷克喺德國隊臨尾一年可以話係英名盡喪，家陣泊到巴塞呢個大碼頭，顯然好想苦幹一番幫自己洗底。如今佢聲言唔止要贏波更要將巴塞嘅華麗DNA帶番嚟，當皇馬又剛好進入「後卻奧斯時代」，對巴塞嚟講會唔會係一次翻身嘅機會？