巴塞隆拿繼星期三主場大勝拜仁慕尼黑4:1，三日後即刻作客大炒皇家馬德里4:0，確立西甲領先位置之餘，皇馬13個月西甲不敗嘅神話亦隨即喺自己地頭告終。

巴塞首先贏在防守部署成功，臨場回防亦跟得足，當皇馬開初想打高壓，巴塞就用快速傳球解困，並轉化為有威脅嘅反擊。首次打El Clasico嘅皇馬前鋒Mbappé當有幾次想屈速都衰越位後，皇馬已經稍為泄氣。加上巴塞呢套結構緊緻嘅4-2-3-1俾到中場好好嘅控制力，經常可以放波去邊路製這威脅，所以到下半場一開始輪到巴塞施壓，前鋒Lewandowski憑住射手嗅覺先後喺第54、56分鐘連入兩球，場波基本格局就已經定咗落嚟，而利雲嘅第二球，正係來自左閘Balde嘅助攻。

呢場嘅皇馬冇咗翼鋒Rodrygo以至龍門Courtois，牌面或係有所削弱，但都唔應該踢出嚟係控球率、射門次數都輸俾死敵。如果話巴塞對拜仁都仍係踢得小心翼翼，今場打皇馬就會係還多添咗好多分激情。就例如4:0後巴塞有個助教慶祝得over咗而令安察洛堤不滿，但可能呢啲先至係巴塞迷最想見到嘅「巴塞DNA入血」場面。