巴黎聖日耳門喺新制歐聯表現令人失望，4輪僅得4分後位列25，連十六強附加賽嘅資格都未有，壓力空前巨大。PSG現時主要問題係法甲以外嘅比賽進攻效率低下，前鋒高路梅安尼（Randal Kolo Muani）喺國家隊都已經叫做有啲貢獻，但喺球會則係乏善足陳，歐聯就更係連同左右兩翼巴高拿（Bradley Barcola）、迪比利（Ousmane Dembele）一齊捧蛋。而教練安歷基（圖左）改用阿辛斯奧（Marco Asensio）踢假9嘅應對方案亦因冇乜成效而受到質疑。

現時歐聯排名只得第17（2勝2負）嘅拜仁近況唔錯，當然希望趁主場追回失地。拜仁星期五早場大勝奧格斯堡，亦一如我哋喺賽事分析所講重新起用唔係全職做防中嘅哥列斯卡（Leon Goretzka，圖右），趁國際賽空檔叉電、減磅嘅哥列斯卡亦都把握到機會，製造出全場第1個助攻。不過哥列斯卡亦都唔會以為自己已經過咗最艱難時期，事關已經傳得好行拜仁終於決定要搶穫斯（亦正如我哋開季時所報咁，利華古遜就算放手都唔會開個荀價），而佢哋好需要出售哥列斯卡free番部分轉會費以至薪酬空間出嚟。不管最後結果如何，嚟緊哥列斯卡必需要把握所有機會表現自己。