尋晚歐洲分組賽兩支法甲隊伍搶晒鏡，但我哋並唔係指PSG：法甲先至剛升上第4嘅里爾喺不被睇好之下作客馬德里體育會完勝3-1，繼主場贏皇家馬德里之後完成「雙殺馬德里」奇蹟。排到聯賽第11嘅比斯特則喺主場逼和德甲冠軍利華古遜，再一次令人刮目相看。

里爾嘅成功出自多個原因。首先係教練真尼斯奧大膽拋浪頭，先將多名主力球員收起，B隊19歲後衛Ousmane Touré上半場充當奇兵帶嚟意想不到嘅效果，全隊就算係早早失波亦沉得住氣，調整戰術後下半場反入三粒，展現咗堅強嘅韌性，亦令億萬大軍馬體會舉手投降。

比斯特繼首場主勝格拉茨後作客大炒薩爾斯堡紅牛4:0，已係平地一聲雷，今場主場對利華古遜首先失波本係平常不過，但有望場之利嘅比斯特仍可以保持冷靜，不繼利用防守反擊搵機會，結果未踢完上半場就已經搵到機會追平1:1，教練艾歷萊爾keep到班波嘅積極心態應記一功。

三round過後大家都唔會再睇小呢兩股法甲異軍。比斯特下場作客布拉格斯巴達，里爾就更係主場大戰意外輸俾史特加嘅祖雲達斯，隨時又會係一場踢得燦爛嘅比賽。